Almatyda 13 jyl resmı qoldanysqa berilmegen tramplınder máselesi qalaı sheshiledi
ALMATY. KAZINFORM — Almatyda úsh tramplınniń qurylysy aıaqtalyp, kelesi jyly paıdalanýǵa berilmek.
Almatyda balalar men jasópirimderge arnalǵan kishi tramplınderge baılanysty túsiniksiz jaǵdaı qalyptasqan. «Suńqar» shańǵy tramplınderi kesheniniń (K95 jáne K120) mańyndaǵy K20, K40 jáne K60 tramplınderi, sondaı-aq tóreshiler munarasy men jattyqtyrýshylardyń ashyq alańy salynǵaly beri qalalyq qurylys basqarmasynyń ıeliginde qalyp qoıǵan. Osy 13 jyl ishinde jattyqtyrýshylar nysanǵa óz kúshimen kútim jasap keledi. Munda tipti jasóspirimder arasyndaǵy qysqy Olımpıada oıyndarynyń chempıonyn tárbıelep shyǵardy. Alaıda qujattar boıynsha shańǵymen sekirý jáne shańǵy qossaıysy sektsııasyna alǵash kelgen búldirshinder shyńdalatyn Qazaqstandaǵy jalǵyz oqý-jattyǵý nysandary áli kúnge deıin paıdalanýǵa resmı berilmegen. Qala ákimdigi 2026 jyldyń ishinde bul olqylyqty joıýdy josparlap otyr.
— «Suńqar» kishi tramplınderinde qurylys jumystaryn júrgizý úshin qazir jobalaý-smetalyq qujattama ázirleýge baıqaý jarııalandy. Qurylys-montajdaý jumystaryn 2027 jyldyń birinshi toqsanynda (qańtar aıynda) aıaqtaý josparlanǵan, — delingen qurylys basqarmasynyń jaýabynda.
Tehnıkalyq-ekonomıkalyq negizdemeni ázirleýshiler aldynda birneshe mindetter qoıylǵan:
— Aıaqtalmaǵan nysandardyń tireýish pen qorshaýlarynyń naqty jaǵdaıyn anyqtaý maqsatynda tekserý júrgizý. Tekserý qorytyndysy boıynsha tehnıkalyq qorytyndy daıyndaý. Onyń sapasyna jobalaýshy kompanııa tikeleı jaýapty.
— Anyqtalǵan zaqym men kemshilikterdi kórsete otyryp, bólshekteý jumystarynyń kólemin naqtylaý.
— Ekologııalyq normalardy (radon jáne gamma-fon deńgeıin) ólsheý, sondaı-aq qajet bolǵan jaǵdaıda aýmaqtyń ormanpatologııalyq zertteý qorytyndysyn alý.
— Tapsyrys berýshige jobalaý jumystarynyń kestesi men qarastyrýǵa arnalǵan eskızdik jobany usyný.
— Elektr qýaty, sýmen jabdyqtaý, káriz jáne jylý júıelerine túsetin júktemelerdi eseptep, buǵan deıin alynǵan tehnıkalyq sharttardy jańartý.
Sportshylar men jattyqtyrýshylar qurylys jumystary bitken soń, qurylys basqarmasy nysandy sport basqarmasyna jáne sporttyq nysandar dırektsııasynyń qaramaǵyna beredi degen úmitte. Bul keshenniń bolashaqta tolyqqandy jumys isteýine jol ashpaq.
Eske salaıyq, buǵan deıin Almaty ákimdiginiń ókilderi «Suńqar» tramplıni bos turýyna baılanysty jaýap berdi.
