Almatyda 13 adam ólim qushqan hosteldegi órt boıynsha is sotqa jiberildi
ALMATY. KAZINFORM – Almaty qalasynyń prokýratýrasy 2023 jyldyń 30 qarashasynda 13 adamnyń ómirin qıǵan hosteldegi órtke baılanysty tergeýdiń aıaqtalǵanyn habarlady. Іs sotqa jiberilgen.
Prokýratýranyń málimetine sáıkes, bul fakt Qazaqstan Respýblıkasy Qylmystyq kodeksiniń 292-babynyń 3-bóliginde kózdelgen qylmystyq quqyq buzýshylyq quramynyń belgileri boıynsha Sotqa deıingi tergep-tekserýdiń biryńǵaı tiziliminde tirkelgen (eki jáne odan da kóp adamnyń abaısyzda qaıtys bolýyna ákep soqqan, olardy saqtaýǵa jaýapty adamnyń órt qaýipsizdigi talaptaryn buzýy).
– Eki adam aıyptalýshy retinde jaýap beredi. Aıyptaý aktisi bar qylmystyq is Almaly aýdanynyń sotyna qaraý úshin jiberildi, - dep habarlady qalalyq prokýratýradan.
Qazaqstan Respýblıkasy Qylmystyq-protsessýaldyq kodeksiniń 201-babyna sáıkes tergeý múddesinde sotqa deıingi tergep-tekserýdiń ózge de derekteri jarııa etilýge jatpaıdy.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy. Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy. Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
Ótken jyldyń jeltoqsan aıynda hosteldiń basshysy ustaldy.