Almatyda 1,2 mlrd teńgege baǵalanǵan kıik múıizi satylymǵa shyǵaryldy
ALMATY. KAZINFORM — Almatyda 1 tonna kıik múıizi aýktsıonǵa qoıyldy.
E-Qazyna portalyndaǵy habarlandyrýǵa sáıkes, lottyń bastapqy baǵasy — 1,2 mlrd teńge.
Kıik múıiziniń bir kelisi 2,6 myń AQSh dollary retinde baǵalanǵan. Aýktsıon 21 tamyz kúni saǵat 10:00–de bastalady. Oǵan qatysý úshin 184,07 mln teńge kóleminde kepildik jarna engizý qajet.
Portaldaǵy aqparatqa sáıkes, múıizderdiń ortasha uzyndyǵy — 25 sm. Qazir olar Almaty qalasy Erevan kóshesi, 2v mekenjaıynda ornalasqan.
Satýshy tarap — «Jasyl damý» AQ, al balans ustaýshy — QR Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Ohotzooprom» óndiristik birlestigi» RMQK.
Eske salaıyq, buǵan deıin aýktsıon arqyly Almatyda ornalasqan «Baısat» bazary 24 mlrd teńgege satylǵany belgili boldy.
