Almatyda №126 baǵyttaǵy avtobýstar sany kóbeıdi

ALMATY. KAZINFORM – Almatyda 14 naýryzdan bastap №126 baǵytta «Qaıyrbekov/Jibek joly – Dıspetcherlik pýnkt» boıynsha júretin avtobýstar jańartylyp, jyljymaly birlikter sany artty. 

Almaty ákimdiginiń málimetinshe, júıelilikti qamtamasyz etý jáne josparlanǵan qozǵalys aralyǵyn 20 mınýttan 6 mınýtqa deıin qysqartý maqsatynda qalalyq mobıldilik basqarmasy 8 avtobýstyń ornyna 25 avtobýs shyǵarý týraly sheshim qabyldady.

Golden Dragon markaly 12 metrlik jańa avtobýstar zamanaýı jabdyqpen jabdyqtalǵan. Atap aıtar bolsaq, aýabaptaǵysh, beınebaqylaý júıeleri jáne telefondardy zarıadtaýǵa arnalǵan USB konnektorlar bar. Sonymen qatar salonǵa aıaldamalardy kórsetetin aqparattyq dıspleı ornatylǵan. 

Bul rette bosatylǵan avtobýstar basqa baǵyttardy kúsheıtýge jáne «AlmatyElektroTrans» avtoparkiniń rezervtik quramyna jiberiledi.

Bıyl taǵy 600 avtobýs, 100 trolleıbýs jáne 100 elektroavtobýs satyp alý josparǵa engizilgen.