Almatyda 12 jyl kezekte turǵandar baspanaly boldy
ALMATY. KAZINFORM – Almatyda 200-den astam otbasy baspanaly boldy. Shańyraq alyp, shattanǵandardyń deni áleýmettik áljýaz sanattan. Kóp jyl kezekte turǵandar.
Halyqtyń áleýmettik osal toptary sanatyna jatatyn 218 kezekte turǵan almatylyq páter kiltterin aldy. Barlyǵy úsh jańa úıde 78 jetim bala, I jáne II toptaǵy 31 múgedek, Ekinshi dúnıejúzilik soǵys jeńildikteri boıynsha teńestirilgen 4 ardager, múgedek balalardy tárbıelep otyrǵan 23 otbasy, 72 tolyq emes otbasy jáne 10 zeınetker.
«Búgin qonys toıyn 2011 jyldan 2012 jylǵa deıin kezekte turǵandar atap ótti. Kelesi aptada turǵyn úıdiń jańa sharshy metrine qonystanýdyń kezekti kezeńi josparlanýda», - dedi Almaty qalasy kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.
Páterlerdiń kiltterin alý úshin adamdar balalarymen jáne nemerelerimen keldi. Olardyń arasynda bir bólmeli páter alǵan kópbalaly ana Maıra Álibaeva da bar.
«Men 75 jastamyn, 11 balanyń anasymyn. Buryn qalada ulymnyń otbasymen birge turdym. Endi men óz páterimde arbaǵa tańylǵan ulymmen birge turamyn. Qala bıligine jańa sharshy metr úshin óte rızamyn», - dedi ol.
Esterińizge sala keteıik, HÁOT sanatyndaǵy kezekte turǵandarǵa kiltterdi tapsyrý aǵymdaǵy jyldyń 25 mamyrynda bastalǵan bolatyn.
Mamyrdyń 28 –de kezektegi 164 adam jańa úıge qonystandy.
30 mamyrda taǵy 105 kezekte turǵandar kiltterin aldy. 5 maýsymda 111 otbasy jańa úılerge kóshti.
Osy jyldyń 7 maýsymynda qonys toıyn Medeý sıtı turǵyn úı kesheninde 86 adam atap ótti.
Aıta keteıik, Almaty qalasynyń ákimi Erbolat Dosaevtyń tapsyrmasy boıynsha 2024 jyly qalanyń kommýnaldyq turǵyn úı qorynan halyqtyń áleýmettik osal toptarynyń tizimi boıynsha kezekte turǵan azamattarǵa kezektilik tártibimen eki myń jalǵa beriletin páter berý josparlanyp otyr, onyń ishinde 400 páter jetim balalarǵa beriletin bolady.
