Almatyda 12 jeke úı súrilip, ornyna jańa turǵyn úıler salynady
ALMATY. KAZINFORM – Almatynyń Bostandyq aýdanyndaǵy jeke turǵyn úılerdi renovatsııalaý jobasyna ınvestorlar izdestirilip jatyr.
Investor jalpy quny 1,8 mıllıard teńgege baǵalanǵan turǵyn úılerdi satyp alyp, olardyń ornyna jańa úıler salýy tıis.
Habarlandyrýdy qalanyń turǵyn úı qoryn renovatsııalaý baǵdarlamasynyń ákimshisi – «Almaty» áleýmettik-kásipkerlik korporatsııasy jarııalady.
Jarııalanǵan aqparatqa sáıkes, №16 nysan Bostandyq aýdanynda ornalasqan. Joba aıasynda Tlendıev, Kishi Abaı, Prokofev kósheleri men Abaı dańǵylynyń qıylysyndaǵy 12 jeke turǵyn úıdi buzý josparlanyp otyr. Aýmaqtyń jalpy kólemi – 1,5 gektar.
Olardy satyp alýdyń boljamdy quny 1,8 mlrd teńgege baǵalanǵan. Al jumystyń birinshi kezeńin bastaý úshin ınvestordyń 350 mln teńge qarajaty bolýy jetkilikti.
Shart boıynsha renovatsııa jobasyn júzege asyrý merzimi 36 aıdan aspaýy kerek. Onyń ishinde turǵyn úılerdi satyp alyp, menshik ıelerin kóshirýge 12 aıdan artyq ýaqyt berilmeıdi. Bolashaq turǵyn úılerdiń qurylys jobasy men qabat sany egjeı-tegjeıli josparlaý jobasyna (EJJ) sáıkes aıqyndalady.
Áleýetti ınvestorlardan ótinimder 2026 jylǵy 19 qarasha kúni saǵat 17:00-ge deıin qabyldanady. Al biliktilik talaptaryna sáıkestigin rastaıtyn qujattardy 20-26 qarasha aralyǵynda tapsyrý qajet.
Іrikteýge biliktilik talaptaryna saı keletin zańdy tulǵalar men zańdy tulǵalar konsortsıýmdary qatysa alady. Úmitker kompanııalarge qoıylatyn talaptar:
* Sońǵy úsh jylda shyǵynsyz jumys isteýi,
* Qazaqstanda keminde eki jyl qurylys tájirıbesi bolýy,
* Paıdalanýǵa berilgen turǵyn úıleriniń jalpy aýdany keminde 10 myń sharshy metrdi bolýy tıis.
Sonymen qatar I jáne/nemese II sanattaǵy qurylys-montaj jumystaryna arnalǵan lıtsenzııasy bolýy kerek. Kompanııa bankrottyq rásiminde bolmaýy, salyq bereshegi, múlkine salynǵan tyıymdar men sot daýlary bolmaýy tıis. Sondaı-aq basshylyq quramynda sottalǵan adamdar bolmaýy qajet.
Eske salsaq, Almatydaǵy qaraýsyz qalǵan «Jas Otaý» neke saraıy elektrondy saýda-sattyqqa shyǵarylǵan edi.