Almatyda 12 jasar qyzdy arbaýyna túsirmek bolǵan er adam ustaldy

ALMATY. KAZINFORM — Almatyda «Jańa adamdar» jastar qozǵalysy kámeletke tolmaǵan qyzǵa qyryndap, aram oıyn júzege asyrmaq bolǵan kúdiktini áshkereledi.

«Jańa adamdar» belsendileri 12 jasar qyzdyń atynan anketa ashyp, ony tanymal áleýmettik jelilerdiń birine júktegen. Kóp uzamaı ózin «Ádilet» dep tanystyrǵan er adam 12 jasar balanyń paraqshasyna qyzyǵýshylyq tanytqan. Ol kishkentaı qyzǵa pornografııalyq mazmundaǵy sýretter men beınejazbalardy jibergen.

— «Ádilet» ashyq túrde jynystyq qatynasqa túsýdi usynyp, qyzdan ózin jalańash túrde beınejazbaǵa túsirýin surady. Óz degenine jete almaǵan soń, qyzdy «kıno kórýge» shaqyrdy. Chıpsy men kola satyp alyp, ol biz kórsetken mekenjaıǵa — balanyń úıine keldi. Kishkentaı balanyń ornyna ony Jańa adamdardyń «124» azamattyq naýqany belsendileri qarsy aldy. Óziniń ustalǵanyn túsingen er adam qashýǵa árekettendi. Alaıda, páterdiń shyǵa berisinde ony «masqaralaý dálizi» kútip turdy, — dep habarlady «Jańa adamdar» jelide.

Belsendiler túsirgen barlyq materıaldar men habarlamalar quqyq qorǵaý organdaryna berilgen jáne polıtsııa qyzmetkerlerine bul eksperımenttiń ótkizilýi týraly aldyn ala eskertilgen.

Almaty qalasynyń polıtsııa departamenti bul derek boıynsha tekserý jumystary júrip jatqanyn habarlady.

— Obektıvti mán-jaılary anyqtalyp jatyr, — dep habarlady departamentten.

Eske salaıyq, buǵan deıin «Jańa adamdar» Almaty dúkenderindegi jaramsyz ónimmen kúreskenin jazǵanbyz.