Almatyda 12 mıllıon teńge jymqyrǵan sheneýnik sottaldy

ALMATY. KAZINFORM — Memlekettik mekeme basshysynyń orynbasary senip tapsyrylǵan múlikti ysyrap etkeni úshin sottaldy. 

Almaty qalasynyń Almaly aýdandyq sotynda M.-ǵa qatysty qyzmettik ókilettikterin asyra paıdalaný, kásipkerlik qyzmetke zańsyz qatysý, senip tapsyrylǵan bóten múlikti ıemdený nemese ysyrap etý deregi boıynsha qylmystyq is qaraldy.

— Sot anyqtaǵandaı, sottalýshy 2022 jyldyń jeltoqsan aıy men 2023 jyldyń qyrkúıek aıy aralyǵynda memlekettik mekeme basshysynyń orynbasary qyzmetin atqara otyryp, «B» JShS-niń qyzmetin basqarýǵa zańsyz qatysqan. Qyzmettik ókilettigin paıdalana otyryp, ol atalǵan kompanııaǵa qamqorlyq kórsetip, óz paıdasyn kózdegen. Atalǵan áreketterdiń saldarynan memleketke 12 mıllıon teńgeden astam materıaldyq zalal keltirilgen, — dep habarlady qalalyq sotttan.

Prokýror sottan ony bas bostandyǵynan aıyrý túrindegi jaza taǵaıyndaýdy surady.

Sottalýshy kinásin moıyndaǵan joq.

— Sot úkimimen sottalýshy kináli dep tanylyp, 4 jyl 6 aı merzimge bas bostandyǵynan aıyrý jazasy taǵaıyndaldy, — delingen habarlamada.

Sot úkimi zańdy kúshine engen joq.

Osyǵan deıin Tarazda qurylys bóliminiń basshysy 4 jylǵa sottalǵany týraly jazǵan edik.