Almatyda 12 qarashaǵa deıin jańbyr jaýady: ákimdik turǵyndarǵa eskertý jasady

ALMATY. KAZINFORM — 10 qarasha keshki ýaqyttan bastap Almatyda jaýyn-shashyn túsip, 12 qarashaǵa qaraǵan túnge deıin jalǵasady.

Almatyda 12 qarashaǵa deıin jańbyr jaýady: ákimdik turǵyndarǵa eskertý jasady
Foto: Almaty ákimdigi

«Qazgıdromet» RMK boljamyna sáıkes, qalanyń keıbir aýdandarynda nóser jańbyr jaýyp, Almatynyń joǵarǵy bóliginde jańbyr qarǵa ulasýy múmkin.

Jaýyn-shashynnyń negizgi bóligi 11 qarashaǵa qaraǵan túni túsedi dep boljanyp otyr. Qalada 20 mm-ge deıin, taýly aýmaqtarda 30 mm-ge deıin jaýyn-shashyn bolýy yqtımal. Kúndiz taǵy 5-7 mm jańbyr jaýady. Jeldiń ekpini sekýndyna 15-20 metrge deıin jetýi múmkin.

Sınoptıkter 12 qarashaǵa qaraǵan túni de jańbyr, qar jaýyp, tuman túsetinin boljaıdy.

— Aýa raıynyń qolaısyzdyǵyna baılanysty qalanyń kommýnaldyq qyzmeti kúsheıtilgen jumys rejımine kóshti. Sý basý qaýpi bar aýmaqtarda táýlik boıy kezekshilik uıymdastyryldy. Bul jumystarǵa 1 579 adamnan turatyn 85 jedel brıgada jumyldyrylady. 415 tehnıka, 97 motopompa jáne qum salynǵan 2 950 qap daıyndaldy, — delingen habarlamada.

Sonymen qatar qalany kúndelikti tazalaý jáne kútip ustaý jumystaryna 3 080 jol salasy jumysshysy men 1 225 arnaıy tehnıka tartylady.

Almaty turǵyndary men qonaqtaryna qolaısyz aýa raıy kezinde saqtyq sharalaryn ustaný qajet. Almaty ákimdigi júrgizýshilerge jyldamdyqty azaıtyp, araqashyqtyqty saqtaý jáne sý jınalýy múmkin jerlerge kólik qoımaýǵa keńes beredi.

Múmkindiginshe taýly aımaqtarǵa barmaǵan jón. Al qatty jel kezinde aǵashtardyń astynda, jarnama qurylymdary men elektr jelileriniń mańynda júrmegen abzal.

Eske salsaq, Aqtaýdy jańbyr basyp, kóshelerden 10 myń tekshe metr sý sorylǵan edi.