Almatyda 12 qabatty úıdegi órtten 10 adam qutqarylyp, 72 turǵyn kóshirildi
ALMATY. KAZINFORM – Medeý aýdanyndaǵy Samal-2 shaǵyn aýdanynda ornalasqan turǵyn úıdiń 12-qabatynda órt shyǵyp, TJM qyzmetkerleri 10 adamdy qutqardy jáne 72 turǵyndy evakýatsııalady, dep habarlaıdy QR Tótenshe jaǵdaılar mınıstrliginiń baspasóz qyzmeti.
Qalalyq «112» pýltine Samal-2 shaǵyn aýdanyndaǵy 76-úıde ornalasqan páterden órt shyqqany týraly habarlama túsken. Oqıǵa ornyna jetken órt sóndirý bólimsheleri 12 qabatty úıdiń joǵarǵy qabatyndaǵy páterdiń ashyq jalynmen janyp jatqanyn anyqtady.
Qutqarý jumystary kezinde TJM mamandary 10 adamdy, sonyń ishinde 3 balany órtten aman alyp qaldy. Sonymen birge ǵımarattan 72 turǵyn, onyń ishinde 8 bala men múmkindigi shekteýli 3 azamat evakýatsııalandy.
Tótenshe jaǵdaı qyzmetkerleriniń jedel áreketiniń arqasynda ottyń ǵımarat shatyryna sharpýyna jol berilmedi. Órt 35 sharshy metr aýmaqta tolyq sóndirildi.
Osyǵan deıin Astanada kópqabatty turǵyn úıdiń órtengeni týraly jazdyq.
