Almatyda 12 qabattan joǵary qurylysqa tyıym salynýy múmkin

ALMATY. KAZINFORM – Almaty qalasy máslıhatynyń kezekten tys HHVI sessııasy ótip jatyr. Kún tártibindegi negizgi másele qala aýmaǵyn salý erejelerin bekitý.

Almaty qalasy ákiminiń orynbasary Asqar Ámrın megapolıstiń seısmıkalyq qaýipti ornalasýyn eskere otyryp, qatań shekteýler men qurylys talaptaryn engizý kerek ekenin aıtty.

– Negizgi jańashyldyq - núktelik qurylysqa, aýla men rekreatsııalyq aýmaqtarda jáne 12 qabattan joǵary qurylysqa tyıym salý.Qurylys salýshynyń kóp qabatty turǵyn úıdi paıdalanýǵa berý kezinde jergilikti atqarýshy organ arqyly múlik ıeleriniń birlestigine barlyq qujattamany berý reglamenti bekitilgen. Bul másele qalanyń barlyq qurylys salýshylaryna ortaq,– dedi ol.

Osylaısha, ázirlegen erejeler paıdalanýǵa berýge deıin qurylystyń barlyq tártibin retteıtin bolady.

Kún tártibindegi ekinshi másele - qurylys nysandaryn tekserý tártibin bekitý.

Megapolıs ornalasqan seısmıkalyq aımaqty eskere otyryp, erejeler tek Almaty qalasynyń aýmaǵynda qoldanylady jáne qurylys obektileriniń seısmıkalyq qaýipsizdigin qamtamasyz etýge baǵyttalady.

Inspektsııa barysynda qurylystyń irgetasy men negizgi konstrýktsııalary seısmıkalyq qaýipsizdikke tekseriletin bolady.

– Kelesi másele - jańa Qala qurylysy reglamentin bekitý. Reglament 2040 jylǵa deıin Almaty qalasynyń buryn bekitilgen Bas josparyna sáıkes engiziledi. Qoldanystaǵy ereje 2006 jyly bekitilgen bolatyn. Jańa reglament 5 polıtsentr ortalyǵynyń bir deńgeıde damýyna baǵyttalǵan. Reglament sheńberinde sý qorǵaý, erekshe qorǵalatyn, aeratsııa jáne tıisti normatıvtik talaptar belgilengen jerlerge, fýnktsıonaldyq aımaqtardyń naqty kartalary ázirlendi. Atalǵan kartalar qala aýmaǵynda jáne jekelegen aýdandarda qala qurylysyna shekteýler belgileıdi,–qala ákiminiń orynbasary.

Osyǵan deıin, Almatyda qurylys nysandaryna barý tártibi ózgeretini týraly jazǵan edik.