Almatyda «111» Juz on bir» telehıkaıasynyń jabyq kórsetilimi ótti
ALMATY. KAZINFORM – Almatyda turmystyq zorlyq-zombylyq taqyrybyn kóteretin ári shynaıy oqıǵalarǵa negizdelgen «111» («Juz on bir») telehıkaıasynyń jabyq kórsetilimi ótti. Detektıvtik drama janryndaǵy 40 serııaly telejobanyń alǵashqy bólimi Jibek Joly telearnasynda 16 qyrkúıek kúni kórsetiledi.
«111» Juz on bir» teleserıaly eldegi turmystyq zorlyq-zombylyqtyń aldyn alý júıesin qalaı jumys isteıtinin jáne osyndaı qylmys úshin jaýapkershilikti qatańdatý boıynsha qandaı jumystar júrgizilip jatqanyn kórsetedi.
– Jibek Joly telearnasynyń qory osyndaı qyzyqty jobamen tolyqqanyna qýanyshtymyz. Telehıkaıanyń bir maýsymynda birden 40 serııa túsirilýi – qazaq televızııasynda birinshi ret bolýy kerek. Búginde kóbine 15-20 serııa daıyndalady, al munda birden 40 serııa. Telejobanyń ár bóliminde ómirimizde bolyp jatqan jeke oqıǵalar baıandalady. Sondyqtan mundaı jobanyń jasalýy óte mańyzdy boldy.
Memleket basshysy bıyl sáýir aıynda turmystyq zorlyq-zombylyqpen kúresýge baǵyttalǵan zańǵa qol qoıdy. Bul – qoǵamdaǵy ózekti máselelerdiń biri. Memleket aıtylǵan máselege zań arqyly jaýap berip jatyr. Al, teleserıalda zań qalaı iske asatyny jáne qalaı jumys isteý kerek ekeni kórsetiledi. Sondaı-aq telejobaǵa «111» atynyń berilýi beker emes. Bul shynymen, ómirlik qıyn jaǵdaıdaǵy adamdar habarlasa alatyn telefon nómeri. Aıtylǵan nómer táýlik boıy demalyssyz qupııa túrde qońyraýlardy qabyldaıdy jáne polıtsııamen tikeleı baılanysqan. Polıtsııa qońyraý túsken jaǵdaıda birden is-shara qabyldaıdy. Bul – óte mańyzdy. Biz osy telehıkaıa arqyly azamattyq qoǵamnyń qurylýyna jáne zorlyq-zombylyqtyń kez kelgen túrine qarsy oı-pikirdiń qalyptasýyna áser etkimiz keledi, - dedi QR Prezıdenti Teleradıokesheni dırektorynyń orynbasary Asqar Jaldınov.
«111» Juz on bir» televızııalyq jobasynyń rejısserlik quramy – Beıbit Óner, Berik Jahanov, Modııar Ábdiqadyrov jáne Evgenıı Palamarchýk, al joba prodıýserleri – Anar Júnisova men Anna Chakırtova. Telehıkaıada basty rólderdi Janel Serǵazına men Erkebulan Daıyrov somdady.
