Almatyda 11 magıstraldi kóshede tehnıkalyq trotýarlar salynady

ALMATY. KAZINFORM — Bıyl Almatynyń Bostandyq aýdanynda jańa tehnıkalyq trotýarlar salynady.

Almaty ákimdiginen málim etkendeı, tehnıkalyq trotýarlardy salý jumystary zamanaýı kóriktendirý standarttaryna sáıkes júrgiziledi.

— Jańa jobalar qala ortasynyń jaılylyǵy, ekologııalyq tazalyǵy jáne tartymdylyǵyn arttyrýǵa baǵyttalǵan. Qala ákiminiń tapsyrmasyna sáıkes, 11 magıstraldi kóshede tehnıkalyq trotýarlar tóseledi, - dep habarlady Bostandyq aýdany ákimdiginen.

Joba Sadyqov, Mustafın, Isınalıev, Tilendıev, Radostovets, Ǵabdýllın, Kekilbaıuly, Naýryzbaı batyr, Markov, Ótepov kósheleri jáne Buqar Jyraý býlvaryn qamtıdy.

Byltyr Abaı dańǵyly, Baızaqov kóshesi, ál-Farabı dańǵyly, Serkebaev dańǵyly, Jarokov kóshesi jáne Tımırıazev kóshesine tehnıkalyq trotýarlar salynǵan.

Mamandardyń aıtýynsha, tehnıkalyq trotýar jaıaý júrginshiler men kólik qozǵalysyn naqty bólip, jol apaty qaýpin azaıtady.

— Tehnıkalyq trotýar magıstraldi kóshelerde ornalasqandyqtan, ol topyraqtyń shaıylýyna jol bermeıdi, qardy sapaly túrde tazalaýǵa múmkindik beredi. Sonymen qatar, mundaı trotýarlar sý aǵyzý máselesin sheship, nóser jańbyr kezinde kóshelerdiń sý astynda qalýyn boldyrmaıdy. Biz turǵyndar úshin barynsha yńǵaıly jaǵdaı jasaýǵa tyrysamyz, - dedi aýdannyń ınjenerlik jáne jol ınfraqurylymy bóliminiń ókilderi.

Jumys jyl boıy jalǵasady.

Buǵan qosa, bıyl joldardy aǵymdaǵy jóndeý jumystary jalǵasady. Qazir merdiger uıymdy anyqtaý boıynsha baıqaý rásimderi qolǵa alynǵan. Jóndeý jumystary kelisimshart jasalǵannan keıin bastalady.

Osyǵan deıin 2025 jyly Almatyda 35 shaqyrym jańa jol salynatyny týraly jazǵan edik.