Almatyda 1000 túp alma aǵashy otyrǵyzylady
ALMATY. KAZINFORM - Almatyda jappaı aǵash pen gúl otyrǵyzý naýqany bastaldy. Mádenıet salasynyń ókilderi teatrlar men mýzeılerdiń, kitaphanalar men arhıv, zoobaq pen tsırk aýmaǵyna, sondaı-aq qaladaǵy saıabaqtar men skverlerde 1000 túp alma aǵashyn otyrǵyzýdy josparlap otyr.
«Taza Qazaqstan» respýblıkalyq ekologııalyq aktsııasy aıasynda ótip jatqan «Almaty – bizdiń ortaq úıimiz» naýqanyna ult janashyry, halyq aqyny, jazýshy, qoǵam qaıratkeri, Qazaqstannyń Eńbek Eri Muhtar Shahanov qoldaý kórsetti. Ol «Alataý» dástúrli óner teatry aldyna alma aǵashyn otyrǵyzyp, ekologııalyq sharanyń qalanyń tynys-tirshiligi úshin asa mańyzdy ekenin jetkizdi.
«Bul – jaqsy qasıetterdi nasıhattaıtyn, yntymaq pen aýyzbirshilikke shaqyratyn jáne meıirimdilikke baýlıtyn úlken is-shara. Men 82 jasta bolsam da, ortaq múddemiz úshin azamattyq belsendilik tanytyp, aǵash otyrǵyzýǵa keldim. Ásem Almatymyzdy kórkeıtý jolynda qala turǵyndary ǵana emes, qonaqtary da atsalysýy qajet. Mundaı bastamalardy qoldaǵan durys dep oılaımyn. Almaty ekologııalyq mádenıet joǵary damyǵan qalaǵa aınalýǵa tıis. Soǵan tyrysýymyz kerek», – dedi Qazaqstannyń Eńbek Eri Muhtar Shahanov.
Sondaı-aq teatr aldyna mádenıet salasynyń basqa da tanymal ókilderi óz atynan alma kóshetin ekti. «Alataý» dástúrli óner teatrynyń aldyna barlyǵy 60 aǵash jáne 2500 gúl otyrǵyzyldy.
Buǵan qosa, Almaty haıýanattar baǵynyń aýmaǵynda sala qyzmetkerleri 250 túp shomyrt, mamyrgúl, tal, talshyn, badam, jańǵaq jáne kókterek otyrǵyzdy. Al Qazaq memlekettik tsırkiniń aýmaǵynda 70 kóshet jáne 40 gúl, qalalyq mýzeıler aýmaǵynda 130 aǵash jáne 400-den astam gúl otyrǵyzyldy.
Aıta keteıik, 27 sáýir kúni Almatyda «Almaty – bizdiń ortaq úıimiz» naýqany aıasynda jappaı alma kóshetteri egiledi. «Almaty – baq qala» aktsııasy barysynda barlyǵy 7 705 jasyl jelek, onyń 4 015 jemis (3 855 alma aǵashy) jáne 1 090 japyraqty aǵash, 2 600 buta (sántal, yrǵaı, qabyrjyq, qarjemis jáne t.b.) otyrǵyzyldy.
Buǵan deıin Almaty taýlaryna 500 órik kósheti otyrǵyzylǵany týraly jazǵan edik.
Aıta keteıik, Memleket basshysy megapolıske jasaǵan is sapary barysynda Almatyǵa «jasyl qala» mártebesin qaıtarýdy tapsyrǵan bolatyn.
«Men Qazaqstan boıynsha 2 mıllıard túp kóshet otyrǵyzý bastamasyn usyndym. Óıtkeni biz, shyn máninde, kógaldandyrýǵa zárýmiz. Almaty buryn jasyl qala edi. Ókinishke qaraı, qazirgi kezde bul mártebesin joǵaltyp aldy. Aıyrylyp qalǵan mártebemizdi qaıtarýymyz kerek. Aǵash egý – bıik mádenıettiliktiń belgisi», – degen edi Qasym-Jomart Toqaev.
Sondaı-aq, 12 sáýir kúni Memleket basshysy sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtab otyrysy barysynda, Taza Qazaqstan – kózboıaýshylyq jasaıtyn senbilik emes ekenin basa aıtqan bolatyn.
«Sý tasqynyna ushyramaǵan óńirlerde meniń tapsyrmammen «Taza Qazaqstan» naýqany bastaldy. Men ákimderdiń bárine bul birrettik naýqan emes ekenin eskerttim. Basqasha aıtqanda, senbilikke shyǵyp, jumys istegen syńaı tanytyp, kózboıaýshylyq jasaýǵa bolmaıdy. Kórshiles elderdegi sekildi bizge de Qazaqstandy kógaldandyrý, óńirler men qalalardyń aýmaqtaryn tazartý jumystaryn únemi júrgizý kerek», – dedi Qasym-Jomart Toqaev.
