Almatyda 100-ge jýyq kınojobanyń ashyq qorǵaýy ótedi

ASTANA. KAZINFORM — 9-12 maýsym aralyǵynda Almatyda kınojobalar konkýrsynyń eki kezeńinen sátti ótken jobalardyń pıtchıngi ótedi. Bıylǵy pıtchıngte 99 joba qorǵalady, dep habarlaıdy QR Mádenıet jáne aqparat mınıstrliginiń baspasóz qyzmeti.

Qorǵaý Ulttyq kınony qoldaý memlekettik ortalyǵynyń resmı YouTube arnasynda tikeleı efırde kórsetiledi.

— Baıqaýǵa qatysýǵa ótinim qabyldaý 5 naýryzda bastaldy. Kórkem, derekti jáne anımatsııalyq fılm sektsııalarynda 444 joba tirkeldi. Baǵalaý nátıjesi boıynsha 128 joba ekinshi kezeńge ótip, qatysýshylar tolyq qujattar paketin usyndy. Nátıjesinde 99 kınojoba pıtchıngke joldama aldy, — delingen habarlamada.

Qańtar aıynda Kıno ortalyǵy ulttyq ıdeologııaǵa saı keletin, ózekti máselelerdi kóteretin basym taqyryptardy jarııalaǵan bolatyn. Atalǵan taqyryptar boıynsha stsenarııler baıqaýǵa qatysyp, memlekettik qarjylaı qoldaýǵa úmitker bolýǵa múmkindik aldy. Basym taqyryptardyń qatarynda tarıh, tanymal tulǵalar, áıelder men balalardyń quqyǵyn qorǵaý, tabıǵı baılyqty saqtaý, ekologııa jáne týǵan ólkeniń kórkem tabıǵaty bar.

Aıta keteıik, kınojobalardy irikteý konkýrsy barysynda Astanadaǵy Ortalyq keńsede, telefon, offlaın kezdesý jáne áleýmettik jelidegi keri baılanys arqyly konsýltatsııa jumystary júzege asty.

Buǵan deıin «Ulttyq kınony qoldaý memlekettik ortalyǵy» 2025 jylǵy ulttyq fılmder dep tanylýǵa úmitti kınojobalardy irikteý konkýrsyn jarııalaǵanyn jazǵanbyz.