Almatyda 100-den astam adam jańa jyldy aıyqtyrǵyshta qarsy aldy
Almatyda 100-den astam adam jańa jyldy aıyqtyrǵyshta qarsy aldy. Bul týraly qalalyq psıhıkalyq saýyqtyrý ortalyǵynyń dırektory Sapar Rahmensheev málim etti, dep habarlaıdy Kazinform.
Aıtýynsha, Jańa jyl merekesi kúnderi ortalyqtyń ýaqytsha beıimdeý jáne detoksıkatsııa bólimi qyzmetkerleri táýlik boıy meıramhana, kafelerde, otbasylyq dastarqanda alkogol sýsyndaryn shamadan tys iship, qoǵamdyq oryndar men otbasynda, aýlada kópshiliktiń mazasyn alǵandardy qabyldady. El aýzynda «aıyqtyrǵysh» dep atalyp ketken bólimge turǵyndardy polıtsııa qyzmetkerleri jetkizgen.
«Bizdiń aıyqtyrǵysh bólimi mamandarynyń maqsaty - mas kúıinde jetkizilgen adamnyń esin jııýǵa kómektesý. Munda túskender 3 saǵattan kóp emdeledi. Esin jıǵannan keıin ol adamdy úıine jiberemiz. Eger mas kúıinde esinen aıyrylyp, óz áreketine baǵa bere almaıtyn adamdy dári-dármekpen emdeý qajet bolsa, barlyq em-dom kórsetiledi. Aıyqtyrǵyshta bilikti dáriger narkologtar, orta jáne kishi býyn qyzmetkerleri, kúzet qyzmetiniń jigitteri eńbek etedi. Keıde mas kúıde jetkizilgen adam medıtsına qyzmetkerlerine shabýyl jasap, kúsh kórsetýi múmkin. Sondyqtan kúzet qyzmeti atalǵan mamandardyń qaýipsizdigin qadaǵalaıdy», - deıdi ortalyq basshysy.
Sapar Rahmensheevtiń sózinshe, jańa jyldy ortalyqta qarsy alǵandar da bar.Túnimen tóbelesip, tań atqansha alysyp, dárigerlerdi ábigerge salatyn almatylyqtar da az emes.
Mamandar er azamattar esin jııatyn bólimge aşy sýǵa sylqııa toıyp, polıtsııa qyzmetkerleriniń jaǵasyna jarmasyp, urys-aıqaıy jer jaratyn qyz-kelinshekterdiń kóbeıgenine alańdaıdy.
«Ertegi keıipkerlerin somdap, birneshe merekelik keshte qımyl-áreketin baqylaý, basqarý múmkindiginen aıyrylǵan ónerpazdar da merekede ortalyqta túnedi. Aıaz ata, Qarsha qyz, Jalmaýyz kempir, Santa Klaýs, aıýlar da aıyqtyrǵyshta esin jıdy», - deıdi ol.
Aıtýynsha, byltyr 11 aıda ortalyqtyń ýaqytsha beıimdeý jáne detoksıkatsııa bólimine 6 myńnan astam adam jetkizilipti. Olardyń 5 256-y erler, 800-ge jýyǵy áıelder. Olardyń ishindegi eń jasy - 19 jasta. 2022 jylǵy statıstıkalyq kórsetkishpen salystyrǵanda bul bólimniń qyzmetine júgingen turǵyndardyń sany 10,7%-ǵa kóbeıgen.
