Almatyda 10 myń mektep oqýshysy APV-ǵa qarsy vaktsına aldy

ALMATY. KAZINFORM – Almaty qalasy mektepteriniń medıtsınalyq kabınetterinde 11 jastaǵy qyzdarǵa adam papılloma vırýsyna qarsy josparly vaktsınatsııalaý júrip jatyr.

Almaty qalasynyń sanıtarııalyq-epıdemıologııalyq baqylaý departamenti basshysy Qasymhan Alpysbaıulynyń aıtýynsha, osy jyldyń 20 maýsymyna deıin qalada APV-ǵa qarsy birinshi dozamen barlyǵy 10 293 qyz vaktsınatsııalanǵan. Onyń ishinde 4429 qyz 11 jasta, 5864 qyz 12-13 jasta. Al APV-ǵa qarsy ekinshi dozamen barlyǵy 4171 qyz vaktsınatsııalandy.

- Vaktsınatsııalanǵan qyzdar arasynda protsedýradan keıin qolaısyz jaǵdaılar tirkelmegen. Vaktsınatsııalaýǵa ruqsaty bar medıtsına qyzmetkerleri qyzdardy qarap, tekserýden ótkizip, vaktsınatsııalaýdy júrgizýge ata-anasynan kelisim alǵannan keıin júrgizedi, - dedi Qasymhan Alpysbaıuly.

Departament málimetine sáıkes, APV-ǵa qarsy vaktsınatsııa Dúnıejúzilik densaýlyq saqtaý uıymynda sertıfıkattalǵan. Elimizde 2 dozadan turatyn, Qazaqstan Respýblıkasynda tirkelgen AQSh-tyń 4 valentti «Gardasıl» vaktsınasyn qoldanady.

- Elimizde jyl saıyn 1900-ge jýyq áıelden jatyr moıny obyry anyqtalady, onyń ishinde 600 áıelde qolaısyz nátıje kórsetiledi. Statıstıkaǵa sáıkes, kún saıyn 2 áıel jatyr moıny obyrynan qaıtys bolady. Sondyqtan APV-ǵa qarsy vaktsınatsııa balanyń ómirindegi mańyzdy qadam, - dedi Almatynyń bas sanıtarııalyq dárigeri.

Eske salaıyq, byltyr Almatyda 5 myńǵa jýyq qyz APV-ǵa qarsy vaktsına alǵanyn jazǵanbyz.