Almatyda 10 kúnde 16 myńnan asa jol erejesin buzý deregi anyqtalǵan
ASTANA. KAZINFORM — Almatyda júrgizilgen óńirlik «STOP buzýshylyq» sharasy aıasynda 70-ten asa júrgizýshi 7 jylǵa kólik tizgindeý quqyǵynan aıyrylǵan.
Bul týraly Almaty qalalyq PD resmı ókili Jibek Joly arnasynyń «Búgin LIVE» baǵdarlamasyna bergen onlaın suhbatynda habarlady.
Profılaktıkalyq keshendi shara 21 naýryz kúni bolǵan qaıǵyly jaǵdaıdan keıin uıymdastyrylǵan.
— Oqıǵadan keıin profılaktıkalyq keshendi is-sharalar júrgizildi. Elimizdiń 4 óńirinen 20 polıtsııa ekıpajy jumyldyryldy. Olar bir apta boıy Almaty qalasynda qyzmet etip, keıin óz óńirlerine qaıtyp ketti. Qazir ahýal turaqty, — dedi Saltanat Ázirbek.
Spıker Almatydaǵy kólik qozǵalysynyń joǵary ekenin aıtyp, joldaǵy jaýapkershilik ár júrgizýshige baılanysty ekenin jetkizdi.
— Almaty qalasy elimizdegi eń iri megapolıs bolǵandyqtan, kúnine 1,5 mln-ǵa jýyq kólik kirip-shyǵady. Kún jylyǵannan bastap halyq elektromobılderdi de qarqyndy túrde paıdalanyp jatyr. Sol sebepti ózge óńirlerge qaraǵanda munda jol ahýaly kúrdelirek. Sondyqtan jol qozǵalysyna qatysatyn árbir azamat jeke jaýapkershilikti sezinýi tıis, — dedi ol.
Sondaı-aq polıtsııa ókili «STOP buzýshylyq» is-sharasy barysynda anyqtalǵan quqyq buzýshylyqtar statıstıkasyn jarııalady.
— 10 kún boıy «STOP buzýshylyq» atty keshendi is-shara júrgizdik. Osy keshendi is-shara júrgizilgen 10 kún ishinde 16 576 azamat jaýapkershilikke tartyldy. 2 myńnan asa jyldamdyqty asyrý dereginiń joly kesildi, 70-ten asa mas júrgizýshi tizginnen shettetildi. Olar ákimshilik qamaýǵa alyndy. Sot sheshimimen 7 jylǵa kólik júrgizý quqyǵynan aıyryldy. Byltyrmen salystyrǵanda jol-kólik oqıǵalarynyń sany 12 paıyzǵa tómendedi, — dedi Saltanat Ázirbek.
Onyń sózinshe, Almatyda agressıvti júrgizýshilerdi anyqtaý úshin jasyryn patrýldeý tásili engizilgen.
— Polıtsııa qyzmetkerleri eshqandaı belgisi joq qyzmettik kólikpen júrip, agressıvti júrgizýshilerdi anyqtaıdy. Keıin ratsııa arqyly olardyń málimetin berip, jaqyn mańdaǵy patrýldik ekıpajdar tosqaýyl qoıady. Osy jasyryn profılaktıkalyq shara barysynda 5 kún ishinde 68 qaýipti júrgizýshi anyqtaldy. Olar — 20-35 jas aralyǵyndaǵy azamattar, — dedi spıker.
Sonymen qatar Almatyda túngi ýaqytta fıltratsııalyq beketter de engizilgen.
— Túngi ýaqytta Ál-Farabı dańǵyly boıynda 80 km/saǵ jyldamdyqpen kele jatqan kólik aǵynyna arnaıy jol belgileri qoıylyp, jyldamdyq 80-nen 60-qa, 60-tan 40 km/saǵ-qa deıin tómendetildi. Osylaısha kólikterdi bir qatarǵa tizip, tekserýge múmkindik boldy. Eger júrgizýshiniń is-áreketi kúdik týdyrsa, ony dereý toqtatyp, tekseremiz. Osy sharanyń nátıjesinde birneshe mas júrgizýshi ustaldy, — dedi polıtsııa departamentiniń resmı ókili.
Aıta keteıik, Aqtóbede jyl basynan beri jol-kólik apatynan 27 adam kóz jumǵan.
