Almatyda 10 916 nysanǵa seısmıkalyq aýdıt júrgizildi

ALMATY. KAZINFORM – Almatyda nysandarǵa seısmıkalyq aýdıt júrgizý jumystary qolǵa alyndy. Bul týraly Erbolat Dosaev málimdedi.

Qala ákiminiń aıtýynsha, almatylyqtardyń qaýipsizdigi – negizgi basymdyqtardyń biri.

– Eń mańyzdy mindet – seısmıkalyq qaýipsizdikti arttyrý. Búgingi kúnge deıin 10 916 nysanǵa seısmoaýdıt júrgizildi. Onyń 1 641 kóppáterli turǵyn úı, 9 275 – azamattyq nysan. Osy jyldyń 17 qazanda «Mass Alert» halyqty habardar etetin júıeni paıdalana otyryp, qalalyq seısmıkalyq tekserý júrgizildi, – dedi ákim .

Sonymen qatar tabıǵı táýekelderdi azaıtý maqsatynda 1974 jyldan beri alǵash ret Mohnatka jáne Gorelnık taýlarynda betkeıler tazartyldy. Budan bólek, 6 morenaldy kólde profılaktıkalyq jumystar júrgizildi jáne Esentaı ózeniniń arnasy nyǵaıtyldy. Jer silkinisi týraly aldyn ala eskertýdiń avtomattandyrylǵan júıesin jetildirý úshin 2025-2026 jyldary qosymsha 70 seısmostantsııa ornatylatyn bolady.

Osyǵan deıin Qazaq qurylys jáne sáýlet ǵylymı zertteý jáne jobalaý ınstıtýtynyń óndiris jónindegi basqarýshy dırektory, tehnıka ǵylymdarynyń kandıdaty Eraly Shoqbarov Almatyda qandaı úıler jer silkinisine tótep bere alatyny týraly aıtqan edi.