Almatyda 1 shilde kúni týrısterge arnalǵan jańa qosymsha iske qosylady
ALMATY. KAZINFORM – Almatyǵa kelgen týrıster SuperApp qosymshasy arqyly yńǵaıly saıahattaı alady.
Almaty qalasy Týrızm basqarmasynyń málimetinshe, týrısterge arnalǵan biryńǵaı mobıldi qosymsha qaladaǵy barlyq mańyzdy qyzmetterdi biriktiredi.
Paıdalanýshylar ol arqyly mádenı jáne sporttyq is-sharalarǵa bıletter satyp ala alady, tsıfrlandyrylǵan soqpaq joldar men týrıstik marshrýttar boıynsha baǵyttardy zerttep, josparlaı alady. Odan bólek Almaty qalasy boıynsha ózekti týrlar men ekskýrsııalardy brondap, qalanyń kórnekti oryndary boıynsha VR-saıahattar jasaı alady.
– Almaty qalasy Tsıfrlandyrý basqarmasy «Ońaı» servısi arqyly «Almaty qalasynyń Kólik holdıngi» JShS-men birlesip, barlyq qalalyq qyzmetti bir platformada biriktiretin, qala turǵyndary men týrısterge yńǵaıly bolý úshin barlyq qalalyq servısti usynýǵa arnalǵan biryńǵaı qalalyq mobıldi qosymshany ázirleý jumystaryn júrgizip jatyr. SuperApp jobasynyń basym baǵyttarynyń biri – qala turǵyndary men qonaqtaryna týrızmniń tsıfrlyq ekojúıesine qol jetkizýge múmkindik beretin týrıstik servıster platformasyn damytý, - dep habarlady basqarmadan.
Sonymen qatar Týrızm basqarmasy SuperApp qosymshasyn bıyl 1 shilde kúni iske qosýdy josparlap otyr.
Eske salaıyq, buǵan deıin Almatyda týrısterge arnalǵan resmı gastrogıd usynylǵanyn jazǵanbyz.