Almatyda 1 mln qaryzy bar azamat ózin-ózi aıypturaqta órtedi

ALMATY. KAZINFORM - Almatyda 1 mıllıon teńgeden astam qaryzy bar azamat óz ózin órtedi. Qalalyq polıtsııa ekıpajy onyń ómirin saqtap qaldy.

Almaty qalasy Polıtsııa departamenti málimetine sáıkes, bul oqıǵa 1 qazan kúni Almaty qalasy Túrksib aýdanyndaǵy aıyppul turaǵy aýmaǵynda bolǵan. 33 jastaǵy er adam aldymen kóligin, sosyn ózin órtep jibergen.

«Saǵat 13:10-da mamandandyrylǵan patrýldik polıtsııa batalonynyń ekıpajy «Sýbarý» kóligin toqtatty. Onyń ıesinde 1 mln 300 myń teńge kóleminde tólenbegen aıyppuly bar. Tekserý kezinde júrgizýshiniń mindetti saqtandyrý polısi bolmaǵan. Belgilengen erejelerge sáıkes, kólik quraly mamandandyrylǵan aıyppul turaǵyna qoıyldy. Biraz ýaqyttan keıin júrgizýshi onda qaıtyp kelip, kólik pen ózine benzın shashyp, jaǵyp jiberdi. Polıtsııa qyzmetkerleri er adamdy qutqaryp aldy. Júrgizýshi shuǵyl túrde aýrýhanaǵa jetkizildi. Kólikti sóndirýge polıtsııa qyzmetkerleri men oqıǵanyń kýágerleri qatysty», - dedi Almaty qalalyq PD jergilikti polıtsııa qyzmeti Basqarmasynyń bastyǵy Serik Shýmaev.

Eske salaıyq, buǵan deıin Almaty polıtsııasy kúsheıtilgen rejımge kóshkenin jazǵanbyz.