Almatyda 1 mıllıonǵa jýyq adam buqaralyq sportpen aınalysady
ALMATY. KAZINFORM – Almatyda sportpen aınalysatyn turǵyndar sany mıllıonǵa jýyqtady.
Óńirlik kommýnıkatsııalar qyzmeti alańynda Almaty qalasy sport basqarmasynyń basshysy Darhan Nurhanuly 2025 jylǵy sport salasyndaǵy jetistikter týraly baıandady.
Onyń aıtýynsha, 2025 jyly megapolıste deneshynyqtyrýmen jáne sportpen júıeli túrde aınalysatyn turǵyndar sany edáýir ósken. 2024 jylmen salystyrǵanda bul kórsetkish 40%-dan 42%-ǵa deıin ósip, 955 myń adamǵa jetken. Onyń ishinde balalardyń úlesi - 325 myń.
– 2025 jyly Almatyda 35 iri halyqaralyq sporttyq jarys ótti. Olardyń qatarynda Almaty Marathon, ATP-250 Almaty Open, ústel tennısinen WTT Contender, shahmattan álem chempıonaty, dzıýdodan Azııa kýbogy men basqa da bedeldi jarystar bar, - dedi ol.
Sonymen qatar vedomstvo basshysy qazir Almatyda sporttyń 87 túri boıynsha rezerv daıarlanyp jatqanyn atap ótti. Aıtýynsha, byltyr almatylyq sportshylarǵa 6 187 sporttyq ataq berilgen. Olardyń qatarynda Qazaqstan Respýblıkasynyń 8 eńbek sińirgen sport sheberi men 117 halyqaralyq dárejedegi sport sheberi bar.
– Odan bólek Almaty 2025 jyly Qazaqstan Respýblıkasynyń Ulttyq quramalaryna 2376 sportshy daıarlady. Onyń ishinde 853 sportshy negizgi quramǵa, 713 – jastar quramasyna, 296 – jasóspirimder quramasyna endi. Jalpy ulttyq quramalardyń úshten birin Almaty qalasynyń sportshylary quraıdy, - Darhan Nurhanuly.
Eske salaıyq, buǵan deıin qysqy Olımpıadaǵa qatysatyn qazaqstandyq shańǵyshy qyzdardyń esimderi belgili boldy.