Almatyda 1 mamyr merekesi qalaı toılanady
ALMATY. KAZINFORM – Almatyda 1 mamyr – Qazaqstan halqynyń birligi kúnine arnalǵan negizgi merekelik is-sharalar «Respýblıka saraıy» aldyndaǵy Abaı alańynda ótedi.
Almaty ákimdiginiń málimetinshe, bıyl mereke Qazaqstan halqy Assambleıasynyń 30 jyldyǵyna oraılastyrylyp, «Birligi jarasqan Almaty» degen atpen ótedi.
11:00-den 12:15-ke deıin bas sahnada elimizdiń etnıkalyq jáne mádenı ártúrliligin tanystyratyn qazaqstandyq oryndaýshylar men shyǵarmashylyq ujymdar óner kórsetedi.
Jınalǵandar vokaldy jáne aspaptyq shyǵarmalar, halyq jáne zamanaýı bıler, sondaı-aq túrli mádenıetaralyq popýrrıge kýá bolady.
Almatylyqtar men qala qonaqtaryna arnap L Duo dýeti, daryndy pıanıst Temirlan Beısenbaı (Ratovich), «Diamond» strýndy trıosy, dýdýkıst Meıirman Abdrahmanuly, «Dervıshı», «Made in KZ» toptary, sondaı-aq Bashqurtstannan kelgen «Ay Yola» toby, olar ózderiniń tanymal «Homay» kompozıtsııasyn oryndaıdy. Kúndizgi kontserttik baǵdarlamany Qazaqstannyń halyq artısi Roza Rymbaeva aıaqtaıdy.
12:15-ten 16:00-ge deıin merekelik kontsert etnomádenı birlestikterdiń shyǵarmashylyq ujymdarynyń óner kórsetýimen jalǵasady. Kórermender halyq bılerin, fleshmobty, halyq ánderi men etnıkalyq mýzykalyq kompozıtsııalardy tamashalaıdy.
Keshke Abaı alańynda almatylyqtardy jáne megapolıs qonaqtaryn Qazaqstan estradasynyń juldyzdarymen úlken shoý-kontsert kútip tur.
Keshtiń basty juldyzy – tanymal ánshi Aıqyn Tólepbergen. Sonymen qatar sahnaǵa ánimen kópshiliktiń júregin jaýlaǵan Búrkit, Marsel, Dýman Marat jáne Marhaba Sábı shyǵady.
Kórermenderdi qyzyqty shoý-baǵdarlama, jandy dybys jáne jarqyn atmosfera kútedi. Bastalýy – 19:00.
Sonymen qatar, Abaı alańynda «Edınstvo naroda v fokýse» fotokórmesi ótedi, onda kelýshiler Qazaqstan halqy Assambleıasynyń tarıhyndaǵy sáýleli sátterdi kóre alady.
Buǵan qosa, 1 mamyrda saǵat 10:00-de Tuńǵysh prezıdent parkindegi birlik jarysy ótip, oǵan 300 adam qatysady. Jarys Qazaqstan halqy Assambleıasynyń 30 jyldyǵy men Qazaqstan halqynyń birligi kúnine arnalady.
Merekelik sharalar qalanyń basqa aýdandarynda da ótedi:
– Áýezov aýdanynda 30 sáýirde saǵat 11:00-de Family park-ta «Qazaqstan – birlik pen tatýlyqtyń mekeni» atty etno-kontsert ótedi;
– Alataý aýdanynda merekelik kontsert 30 sáýirde saǵat 15:00-de Innovatsııalyq shyǵarmashylyq ortalyǵynda ótedi, mekenjaıy: Nurkent shaǵyn aýdany, 14a;
– Almaly aýdanynda merekelik kontsert 1 mamyrda saǵat 12:00-de M. Gandı atyndaǵy saıabaqta uıymdastyrylady;
– Bostandyq aýdanynda 1 mamyrda saǵat 12:00-de «Atakent» QІYO arkasy aldyndaǵy alańda merekelik shara ótedi;
– Jetisý aýdanynda 1 mamyrda saǵat 11:00-de Arbatta (Aınabulaq shaǵyn aýdany) turǵyndar úshin merekelik oıyn-saýyq sharalary uıymdastyrylady. Qonaqtar sporttyq jarystar, ınteraktıvti oıyndar jáne anımatorlar men boı kótergen qýyrshaqtardyń qatysýymen túrli baǵdarlamalar kútedi;
– Medeý aýdanynda 1 mamyrda saǵat 12:00-de Ortalyq mádenıet jáne demalys parkiniń ashyq sahnasynda merekelik is-shara ótedi;
– Naýryzbaı aýdanynda merekelik kontsert 1 mamyrda saǵat 11:00-de amfıteatrda ótedi, mekenjaıy: Shuǵyla shaǵyn aýdany, 347;
– Túrksib aýdanynda merekelik kontsert 1 mamyrda saǵat 11:00-de №6 mektep úıi aýmaǵynda ótedi, mekenjaıy: Seıfýllın dańǵyly, 13/1.
Osyǵan deıin, qazaqstandyqtar mamyr aıynda neshe kún demalatyny týraly jazǵan edik.