Almatyda 1 mamyr kúni «Birlik júgirisi» marafony ótedi

ALMATY. KAZINFORM – 1 mamyrda Almaty qalasynda Qazaqstan halqy Assambleıasynyń 30 jyldyǵy men Qazaqstan halqynyń birligi kúni aıasynda «Birlik júgirisi» marafony ótedi.

Іs-shara Tuńǵysh Prezıdent saıabaǵynda ótedi. Qatysýshylar saǵat 09:30–da tirkeledi, al marafon saǵat 10:00–den 11:00–ge deıin bolady. Qatysýshylar saıabaq aýmaǵynda 4 shaqyrymdyq qashyqtyqty júgirip ótedi.

Almaty qalasy Sport basqarmasynyń málimetinshe, marafonǵa 300-den asa adam qatysady dep kútilip otyr. Olardyń qatarynda Qazaqstan halqy Assambleıasynyń 260 ókili, 40 kásibı sportshy bolady. Odan bólek nıet bildirgen barlyq qala turǵyndary men qonaqtary qatysa alady. Qatysýshylar úshin aldyn ala tirkeý qajet emes — tirkeý sharasy marafon ótetin jerde erkin túrde júrgiziledi.

— «Birlik júgirisi» marafony salaýatty ómir saltyn nasıhattaýǵa jáne qoǵamdaǵy birlik pen tatýlyqty nyǵaıtýǵa baǵyttalǵan erekshe shara. Almaty qalasynda ótetin marafon elimizdiń ár óńirinen kelgen adamdardy bir maqsatqa jumyldyryp, dostyq pen yntymaqtastyqty dáripteıdi, — dep habarlady basqarmadan.

Eske salaıyq, 20 sáýir kúni Almatyda jartylaı marafonǵa qatysqan eki adam qaıtys bolǵanyn jazǵanbyz.

Týrızm jáne sport mınıstriniń orynbasary Erjan Erkinbaev marafon talaptaryn kúsheıtýge baılanysty naqty qandaı sharalar qabyldanatynyn aıtty.