Almatyda 1 qyrkúıekten bastap 8 jańa mektep qoldanysqa beriledi
ALMATY. KAZINFORM — Almatyda jańa oqý jylyndyń basynda «Keleshek mektepteri» ashylady.
11 700 oqýshyǵa arnalǵan segiz «Keleshek mektebi» jeke ınvestorlardan «daıyn ónim» mehanızmi boıynsha satyp alynyp jatyr. Olarǵa barlyq ınjenerlik-kommýnıkatsııalyq ınfraqurylymy júrgizilgen.
Almaty ákimdiginiń málimetinshe, byltyr jeltoqsan aıynda segiz nysannyń barlyǵynda qurylys-montaj jumystary aıaqtalyp, nysandarǵa tehnıkalyq tekserý júrgizilgen. Nysandardyń qunyn baǵalanǵan soń, satyp alý-satý sharty jasalǵan. Sonyń nátıjesinda bıyl 1 qyrkúıekten bastap 8 jańa mektep qoldanysqa beriledi.
Olardyń ishinde eń úlkenderi — árqaısysy 2 myń oryndyq «Jeti Qazyna» turǵyn úıi janynda, «Time City» turǵyn úıi janynda jáne «Alǵabas» shaǵyn aýdanynda ornalasqan. 1500 oryndyq taǵy bir mektep «Altyn Sıtı» turǵyn úı mańynda boı kótergen. Árqaısysy 1200 oryndyq «Keleshek mektepteri» 1 qyrkúıekten bastap Shuǵyla shaǵyn aýdanynda («Elimaı» turǵyn úıi), Býrýndaı kóshesi, 91 mekenjaıynda jáne «Ǵajaıyp» shaǵyn aýdanynda oqýshylardy qabyldaıdy. Al 600 orynǵa arnalǵan bilim ordasy «Parasat» turǵyn úı kesheniniń janynda ashylady.
Eske salaıyq, buǵan deıin Almatyda 23 100 oqýshy ornyna 13 jaıly mektep salynǵan. Joba «Samruk Kazyna Construction» AQ arqyly iske asyryldy. Onyń ishinde 600 oryndyq № 97 mektep 2024 jyldyń 1 qyrkúıeginde aıaqtalyp, paıdalanýǵa berildi.
Segiz mektep paıdalanýǵa berý aktisi boıynsha Almaty qalasy Bilim basqarmasyna tapsyrylyp, 2025 jyldyń 1 qyrkúıeginde ashyldy. Onyń ishinde «Samǵaý», «Qarasý» jáne «Terekti» shaǵyn aýdandarynda 2 myń oryndyq mektepter bar. Al 1500 oqýshyǵa shaqtalǵan bilim mekemeleri «Nurly Dala» turǵyn úı kesheni, Raıymbek dańǵyly, 210 mekenjaıy, «Aqbulaq» shaǵyn aýdany jáne Rozybakıev — Levıtan kósheleriniń qıylysynda ashyldy.
Odan bólek 2025 jyldyń ekinshi toqsanynda taǵy bes mekteptiń qurylysy aıaqtalyp, olar jumysyn bastap ketti. «Keleshek mektepteri Ábdenov kóshesinde jáne Egizbaev kóshesi, 9 mekenjaıynda (árqaısysy 2500 oryndyq), Qulja tas jolynda, Rysqulov dańǵylynda jáne Áshimov kóshesinde (árqaısysy 2 myń oryndyq), sondaı-aq „Quramys“ shaǵyn aýdanynda (1500 oryndyq) qoldanysqa berildi.
«Qurylys» mehanızmi boıynsha salynǵan 13 mekteptiń barlyǵyna da kireberis joldary men ınjenerlik-kommýnıkatsııalyq ınfraqurylymy júrgizilgen.
Eske salaıyq, «Keleshek mektepteri» ulttyq jobasy aıasynda 217 mektep ashyldy.
