Almatyda 1 aı buryn jóndelgen jol nelikten qaıtadan qazylyp jatyr
ALMATY. KAZINFORM — Almaty turǵyndary jaqynda jóndeýden ótken joldardyń qaıta qazylýyna narazylyq bildirdi.
Jeli qoldanýshylarynyń biri qalada jóndelgenine 1 aı bolmaǵan jaıaý júrginshiler jolynyń qubyr salý úshin qaıta qazylǵanyn jazǵan.
— Nelikten jańa trotýardy qubyr salý úshin buzyp jatyr? Nelikten bul jumystar aldyn ala istelmegen, — dep jazdy ol.
Atalǵan jazbaǵa pikir bildirgen ózge turǵyndar da uqsas jaǵdaıǵa kýá bolǵandaryn aıtqan. Máselen, biri Gagarın-Solodovnıkova kóshesinde jazda asfalt tóselip, kúzde qubyr júrgizý úshin qaıta buzylǵanyn jazǵan. Ekinshi turǵyn Jarokov-Dýnaevskıı kósheleriniń qıylysynda aldymen tósemtas salynyp, keıin qaıta qazylǵanyn málimdedi.
Atalǵan jazbaǵa Almaty qalasy qoǵamdyq keńistikterdi damytý basqarmasy jaýap berdi.
— Bul mekenjaıda qazir transformatorlyq qosalqy stantsııaǵa qosý jumystary júrgizilip jatyr. Aýmaqty abattandyrý boıynsha qalpyna keltirý jumystaryn, onyń ishinde asfalt-beton jabynyn qalpyna keltirýdi merdiger uıym kepildik mindettemeler sheńberinde oryndaıdy. Barlyq jumystar, sonyń ishinde joldy qalpyna keltirý 2026 jyldyń 10 qarashasyna deıin aıaqtalady, — delingen vedomstvo jaýabynda.
Eske salaıyq, buǵan deıin Almatyda temirjol vokzalynyń aıaldamalary nelikten súrilgenin jazǵanbyz.
