Almaty zoobaǵynda shaıqaǵysh janattar keıingi 20 jylda alǵash ret tóldedi
ALMATY. KAZINFORM — Almaty haıýanattar baǵynda Archı men Bella esimdi shaıqaǵysh janattar úsh kúshik dúnıege ákeldi. Bul — keıingi 20 jylǵa jýyq ýaqyt ishinde haıýanattar baǵynda dúnıege kelgen shaıqaǵysh janattyń alǵashqy tólderi.
Almaty haıýanattar baǵy baspasóz qyzmetiniń málimetinshe, kúshikter 27 sáýirde týǵan. Alǵashqy aılarda olar anasymen birge uıada bolyp, syrtqa shyqpaǵan. Bella tólderin erekshe qamqorlyqpen baǵyp, olarǵa eshkimdi jolatpaǵan. Qazir kúshikter ósip, ózdiginen qozǵala bastaǵandyqtan, úlken qorshaýǵa shyǵyp, aınalany qyzyǵýshylyqpen zerttep júr.
Ázirshe kúshikterdiń jynysy anyqtalmaǵandyqtan, aty da keıinirek qoıylady.
— Shaıqaǵysh janattardyń jańa týǵan kúshikteriniń salmaǵy nebári 60-70 gramm bolady. Olar soqyr ári sańyraý kúıde dúnıege keledi jáne alǵashqy aptalarda tolyqtaı anasyna táýeldi bolady. Bul kezeńde tek ana sútimen qorektenedi. Qazir kúshikter birtindep eresek janýarlardyń azyǵyna úırenip keledi. Ratsıonynda et, balyq, kókónis, jemis-jıdek jáne súıikti suly botqasy bar, — deıdi «Jyrtqysh sútqorektiler» bóliminiń jetekshisi Gaýhar Sergibaeva.
Shaıqaǵysh janattar otbasy haıýanattar baǵynyń kerikter ekspozıtsııasyna qarama-qarsy ornalasqan jyrtqysh ańdarǵa arnalǵan «Leopard» aımaǵyndaǵy eń shetki qorshaýda mekendeıdi.
Mamandar kúshikterdiń aman-esen ósip, jetiletinine senip otyr.
Eske salaıyq, buǵan deıin Almaty zoobaǵynda egiz lemýrlar men aqqol gıbbonnyń tóli týǵanyn jazǵanbyz.
