Almaty zoobaǵynda múıiztumsyqqa tas laqtyrǵan adam izdestirilip jatyr
ALMATY. KAZINFORM – Almaty zoobaǵynda janýarǵa qatygezdik kórsetken adamǵa izdeý salyndy.
Zoobaqqa barǵan qala turǵyny 24 qazanda bolǵan oqıǵa týraly aıtty. Onyń sózinshe, er adam torda ózimen ózi turǵan múıiztumsyqqa tas (nemese áldebir zat) laqtyrǵan. Kýáger bul sátti vıdeoǵa túsirip, áleýmettik jelige jarııalady.
– Anammen birge zoobaqqa barǵanbyz. Sol kezde myna oqıǵa kádimgideı júregimdi aýyrtty. Er adam múıiztumsyqtyń kózine qaraı tasqa uqsas bir zatty laqtyryp jiberdi. Janýar jaıbaraqat turǵan. Ol adam qaraptan-qarap múıiztumsyqqa tıisti. Ne úshin? Keıde adamdar janýardan da qatigez sııaqty kórinedi, - dep jazdy ol.
Zoobaq ákimshiligi bul jazbadan keıin dereý múıiztumsyqty teksergenin habarlady.
– Múıiztumsyqtyń jaǵdaıy jaqsy. Densaýlyǵyna eshqandaı qaýip tónip turǵan joq. Jaraqat, sonyń ishinde kóz jaraqaty da anyqtalǵan joq, - delingen zoobaq taratqan resmı habarlamada.
Mekeme ókilderiniń aıtýynsha, ishki qyzmettik tekseris bastalyp, beınebaqylaý kameralaryndaǵy jazbalar muqııat zerttelip jatyr.
– Zoobaq ákimshiligi quqyq qorǵaý organdaryna júgindi. Buzaqynyń kim ekenin anyqtap jáne ony jaýapkershilikke tartý úshin materıaldyń bári polıtsııaǵa joldandy, - dep habarlady zoobaq baspasóz qyzmeti.
Eske salaıyq, buǵan deıin osyǵan uqsas jaǵdaı Shymkent zoobaǵynda da bolǵan edi. Onda er adam erejeni elemeı, qorshaýdan asyp ótip, túıequsty teýip jibergen jáne basqa janýarlardy ádeıi qorqytqan.