Almaty zoobaǵynda Qyzyl kitapqa engen qonjyqtar dúnıege keldi
ALMATY. KAZINFORM – Almaty haıýanattar baǵynda Qyzyl kitapqa engen Tıan-Shan qońyr aıýlarynyń jubynan eki qonjyq dúnıege keldi.
«Jyrtqysh sútqorektiler» bóliminiń basshysy Gaýhar Sirgebaevanyń aıtýynsha, qonjyqtar Qurmanbek pen Gerdanyń jubynda 1 qańtarda dúnıege kelgen. Bul – Gerdanyń tórtinshi tóli.
– Qonjyqtar óte álsiz bolyp týady: kózi kórmeıdi, qulaǵy estimeıdi, denesi túksiz bolady. Alǵashqy 3-4 aıda olar jyly úıshikte jatyp, enesin emip qorektenedi. Osy ýaqyt boıy zoobaq mamandarynyń baqylaýynda boldy. Qazir eki qonjyq ta ósip qaldy. Gerda tájirıbeli ana, tólderine óte jaqsy kútim jasaıdy. Búginde qonjyqtar anasyna erip, úlken volerge shyǵa bastady, - dedi ol.
Dástúrge saı, Almaty haıýanattar baǵy qala turǵyndaryn jańa týǵan qonjyqtarǵa at qoıýǵa qatysýǵa shaqyrdy. Qonjyqtardyń biri – erkek, ekinshisi – urǵashy.
Aıta keteıik, bıyl qańtar aıy zoobaq úshin erekshe ónimdi kezeń bolǵan. Buǵan deıin munda amýr jolbarystarynyń, sondaı-aq sur jáne qyzyl kengýrýlardyń tólderi týǵan edi.