Almaty zoobaǵynda kamerýn eshkileri tóldedi
ALMATY. KAZINFORM – Almaty haıýanattar baǵy jańa tóldermen tolyqty.
Zoobaq málimetinshe, kamerýn eshkileriniń jubynan eki laq dúnıege keldi.
- Bıyl kamerýn eshkileri bizdi erekshe qýantty. Osy jyldyń alǵashqy kúnderinde – 2 qańtarda Naýryz ben Hanaıym jubynda súıkimdi qos laq dúnıege keldi. Kishkentaı erkek laqqa – Bım, al urǵashysyna – Izıýmınka degen at qoıyldy, - dep habarlady zoobaqtan.
Qazir laqtar qysqy jylyjaıda ornalasqan.
Kún jylynǵan soń olar kórsetilim alańyna shyǵarylady. Almaty haıýanattar baǵy bul – kamerýn eshkileriniń ekinshi tóldeýi ekenin atap ótti.
Eske salaıyq, bıyl 15 qańtardan bastap zoobaqqa kirý úshin eresekterge 1 427 teńge, balalarǵa 562 teńge bolyp ózgerdi. Buryn eresekterge bılet quny 800 teńge, al balalar 300 teńge bolatyn.