Almaty zoobaǵynda eki qonjyq ómirge keldi
ALMATY. KAZINFORM – Almaty haıýanattar baǵynda Tıan-Shannyń aq tyrnaqty aıýlary Gerda men Qurmanbektiń jubynda eki qonjyq ómirge keldi. Zoobaqtyń málimetinshe, olar ótken jyly 19 jeltoqsanynda jaryq dúnıe esigin ashqan.
«Qazir qonjyqtardyń jaǵdaıy jaman emes. Olardyń enesi Gerdanyń da densaýlyǵy jaqsy. Ol osymen úshinshi ret ómirge urpaq ákelip otyr. Gerda buǵan deıin 2017 jáne 2021 jyly tóldep, barshamyzdy qýantqan edi. Ol kezde bizdiń paraqshamyz arqyly sizder olarǵa esim bergensizder», - dep jazdy zoobaq ujymy jelide.
Osy oraıda Kazinform tilshisi Almatydaǵy zoobaq qyzmetkerlerinen osynshama ýaqyt qonjyqtardyń jynysyn anyqtaı almaýdyń sebebin surady. Olar ómirge kelgenine 4 aıǵa jýyq ótse de qonjyqtardyń jynysyn anyqtaý áli múmkin bolmaı turǵanyn, sebebi, enesi tólderin qatty qyzǵanatynyn, mańyna esh adamdy jolatpaıtynyn aıtty.
«Qonjyqtar jarty jylǵa deıin enesiniń sútin emedi. Qazir Gerda mańyna eshkimdi jolatpaıdy, qonjyqtaryn qatty qyzǵanady, olardy kúni boıy baýyryna qysyp jatady. Biz olardy adamdar júrmeıtin jeke apan-úıshikke ornalastyrdyq. Sebebi, enesi adamdardan qyzǵanyp, tólderin talap tastaýy múmkin. Qazir bir qyzmetshimiz ǵana olarǵa kúndelikti tamaqtaryn aparyp berip júr. Basqa eshbir adam olardyń mańyna bara almaıdy. Enesi jolatpaıdy. Shamamen eki-úsh aıdan soń, vaktsına egetin kezde qonjyqtardy jeke alyp, olardyń jynystaryn anyqtaıtyn bolamyz. Qonjyqtardyń jynysy anyqtalǵan soń, olarǵa at qoıýǵa qatysty Instagram paraqshamyzda baıqaý jarııalaımyz», - deıdi zoobaq ókilderi.
Qazir Gerdaǵa laıyqty mólsherde tamaq beriledi. Atap aıtar bolsaq, onyń quramynda jemis-jıdek, et, balyq, botqa, nan, jarma, túrli vıtamınder bar. Kún jylynyp, qonjyqtar ósip-jetile bastaǵanda Gerda olardy daladaǵy qorshaýǵa shyǵaratyn bolady.
Eske salsaq, buǵan deıin zoobaqtyń Instagram paraqshasyndaǵy oqyrmandar ómirge kelgen qonjyqtarǵa esim bergen bolatyn. Atap aıtqanda, 2017 jylǵy tólderge Nık, Nelson, 2019 jyly ómirge kelgen tólge Koda esimin berdi.
