Almaty zoobaǵynda egiz lemýrlar men aqqol gıbbonnyń tóli týdy
ALMATY. KAZINFORM – Almaty haıýanattar baǵynda birden birneshe sırek janýardyń tóli dúnıege keldi. Janýarlardyń belsendi kóbeıetin kezeńinde aqqol gıbbondar men saqınaly quıryqty lemýrlar urpaq órbitti.
Saqınaly quıryqty lemýrlardyń eki juby da egizden tóldegen. Alǵashqy egizder 6 naýryzda, ekinshi juptyń tólderi 17 naýryzda týǵan. Qazir olardyń barlyǵy mamandardyń jiti baqylaýynda bolyp, qalypty ósip-jetilip jatyr.
Sonymen birge 6 naýryzda aqqol gıbbonnyń tóli dúnıege keldi.
– Bul tól haıýanattar baǵynda birneshe býyn boıy jalǵasyp kele jatqan áýlettik jeliniń jalǵasy sanalady. Onyń ákesi Djım de, ájesi Djýlııa da osy haıýanattar baǵynda týǵan. Al onyń arǵy atasy Tabındi haıýanattar baǵynyń turaqty kelýshileri jaqsy tanıdy, - deıdi zoobaq ókilderi.
Mamandardyń aıtýynsha, analyqtar men olardyń tólderiniń jaǵdaıy jaqsy. Kúnniń jylynýyna baılanysty janýarlar jazǵy qorshaýlarǵa shyǵaryla bastady. Endi kelýshiler olardyń tabıǵı ortaǵa barynsha jaqyn jaǵdaıdaǵy tirshiligi men minez-qulqyn tamashalaı alady.
– Aqqol gıbbondar men saqınaly quıryqty lemýrlarda tóldiń dúnıege kelýi osy túrlerdiń genetıkalyq ártúrliligin saqtaýǵa yqpal etedi ári kelýshilerdiń jabaıy tabıǵatty qorǵaý máselesine qyzyǵýshylyǵyn arttyrady, - dedi Almaty haıýanattar baǵy prımattar bóliminiń jetekshisi Sholpan Ábdibekova.
Almaty haıýanattar baǵy qala turǵyndary men qonaqtaryn jańa kishkentaı turǵyndarmen tanysyp, olardyń alǵashqy qadamyna kýá bolýǵa shaqyrdy.
Eske salaıyq, buǵan deıin Almaty zoobaǵynda Qyzyl kitapqa engen qonjyqtar dúnıege kelgenin habarlaǵanbyz.
