Almaty zoobaǵynda amýr jolbarysynyń úsh kúshigi dúnıege keldi
ALMATY. KAZINFORM — Almaty haıýanattar saıabaǵynda jyl basynan beri sırek janýarlar qatary tolyǵyp, kelýshiler sanynyń artqany baıqalady.
Qalalyq mádenıet basqarmasynyń habarlaýynsha, 2026 jyly 11 qańtarda amýr jolbarystary Bentlı men ıArgıden úsh birdeı kúshik dúnıege keldi. Alǵashqy aptalarda shónjikter enesimen birge boldy. Kóktem kelgesin volerge shyǵyp, jańa ortaǵa beıimdele bastady.
— Qazirgi ýaqytta olar enesin emip júr, degenmen qatty taǵamǵa da qyzyǵýshylyq tanytyp, kún ótken saıyn belsendiligi artyp keledi. Kóktemgi maýsymnyń bastalýyna baılanysty jylýdy jaqsy kóretin janýarlar da jazǵy volerlerge shyǵaryldy. Pilder, kerikter, múıiztumsyqtar, zebralar, tapırler men pelıkandar ashyq alańdarǵa shyǵyp, erkin qozǵalyp, tabıǵı tirshiligin jalǵastyryp jatyr, — delingen habarlamada.
Qazirgi tańda zoobaqta ınfraqurylymdy damytý, janýarlardy kútip-baǵýǵa qolaıly jaǵdaı jasaý jumystary jalǵasyp jatyr. Sonymen qatar kelýshilerge arnalǵan tanymdyq baǵdarlamalar da keńeıtilip keledi.
Eske salaıyq, Reseı Qazaqstanǵa tórt Amýr jolbarysyn tabystaıtynyn habarlaǵan edik.
Amýr jolbarystary — buryn Ortalyq Azııa aýmaǵynda mekendegen turan jolbarystarynyń eń jaqyn týystary; Qazaqstanda olar 1948 jylǵa qaraı joıylyp ketken. Atalǵan baǵdarlama arqyly respýblıkada olardyń popýlıatsııasyn qalpyna keltirý kózdelgen.