Almaty zoobaǵynda amýr jolbarysy kúshiktedi
ALMATY. KAZINFORM – Almaty zoobaǵynda 6 jastaǵy Bentlı men 5 jastaǵy Aıkı esimdi amýr jolbarystarynyń jubynan eki jolbarys kúshigi dúnıege keldi.
Almaty qalasynyń mádenıet basqarmasynyń málimetinshe, bul — keıingi jyldardaǵy alǵashqy tól jáne Qyzyl kitapqa engen sırek túrdi saqtaýǵa qosylǵan mańyzdy úles.
— Amýr jolbarysy joıylyp ketý qaýpi bar túrge jatady. Sondyqtan mundaı janýarlardyń zoobaq jaǵdaıynda kóbeıýi genetıkalyq alýandyqty saqtaýda jáne popýlıatsııany qorǵaýda asa mańyzdy ról atqarady. Jolbarystar jubyn qalyptastyrý ońaı emes: tabıǵatynan olar — jalǵyz júretin jyrtqyshtar. Zoobaq mamandary jolbarys serigin muqııat tańdap, volerdi daıyndap, janýarlar ózderin qaýipsiz sezinetin jaǵdaı jasady. Sonyń arqasynda saý tól alýǵa múmkindik týdy, — dep habarlady basqarmadan.
Jolbarys kúshikteri 14 maýsymda dúnıege kelip, alǵashqy aılaryn arnaıy tynysh aımaqta ótkizgen. Bul — shý men syrtqy dybys pen kózge túsetin áserlerdi azaıtatyn arnaıy voler. Mundaı jaǵdaı analyq jolbarystyń kúızelisin tómendetip, tóldiń durys damýyna qajet.
— Amýr jolbarystarynyń óte myqty analyq túısigi bar jáne oqshaýlanýdy qajet etedi. Alǵashqy aılarda tólin qorǵaý úshin kez kelgen syrtqy dybysqa asa sezimtal bolady. Sondyqtan biz oǵan akýstıkalyq jáne vızýaldyq áseri tómen orta jasadyq. Osy ýaqyt boıy otbasy kúndelikti veterınarlyq baqylaýda boldy. Qazir karantın aıaqtaldy, kúshikterdiń jaǵdaıy jaqsy, naǵyz jolbarysqa tán qylyqtaryn kórsete bastady, — dedi zoobaqtyń bas veterınarlyq dárigeri Vıtalıı Sachkov.
Aldaǵy demalys kúnderi anasymen birge jolbarys kúshikteri jańa volerge kóshiriledi.
Eske salaıyq, buǵan deıin Almaty tsırki men qalalyq zoobaqtyń jańa jobasy 100 mln teńgege ázirlenip jatqanyn jazǵanbyz.