Almaty zoobaǵyna jaralanǵan maral jetkizildi
ALMATY. KAZINFORM – Aqsaı shatqalyndaǵy saıajaı mańynan jaraly jabaıy maral tabyldy.
«Іle Alataýy memlekettik ulttyq tabıǵı parki» respýblıkalyq memlekettik mekemesinen málim etkendeı, 25 shilde kúni saǵat 20:00 shamasynda Aqsaı shatqalyndaǵy saıajaı turǵyndarynyń biri park qyzmetkerlerine habarlasyp aımaqta álsiregen maraldyń júrgenin jáne oǵan veterınarlyq kómek qajet ekenin jetkizdi.
Atalǵan mekenjaıǵa dereý Ulttyq parktiń Aqsaı fılıalynyń jedel toby shyqty.
«Mamandar jabaıy janýardy qarap shyǵyp, jaǵdaıdy basshylyqqa jetkizdi. Ýaqyt kesh bolǵandyqtan, maraldy «Aksay river» demalys aımaǵynyń qorasyna qaldyryp, kelesi kúni janýardy Almaty haıýanattar baǵyna tekserip, veterınarlyq emdeý úshin tasymaldaý týraly sheshim qabyldandy», - delingen habarlamada.
26 shilde kúni Almaty zoobaǵynyń bas veterınary jaraly buǵyny qarady. Keıin jabaıy janýar arnaıy kólikpen haıýanattar baǵyna jetkizildi.
