Almaty zoobaǵyna Jańa Gvıneıanyń alyp kesirtkeleri ákelindi
ALMATY. KAZINFORM — Almaty haıýanattar baǵy sırek kezdesetin janýarlarmen tolyqty.
Almaty ákimdiginiń málimetinshe, endi zoobaqqa kelýshiler Salvador kesirtkelerin kóre alady. Bul baýyrymen jorǵalaýshynyń otany — Jańa Gvıneıa. Tabıǵatta olar álemniń basqa jerinde kezdespeıdi. Biraq on jastan asqan kesirtkeler juby Almatyǵa Indonezııadan jetkizilgen.
Salvador kesirtkesi (Varanus salvadorii) keı elderde artellııa, kabaragoııa nemese «qoltyraýyn kesirtkesi» degen ataýlarmen de belgili. Ol iri dene bitimimen, uzyn ári qýatty quıryǵymen jáne qoltyraýyn terisine uqsas erekshe qabyrshaqty terisimen erekshelenedi.
— Baýyrymen jorǵalaýshylar zoobaǵymyzda ózderin jaqsy sezinip keledi. Olar tabıǵı meken etý ortasyna barynsha uqsatyp jabdyqtalǵan terrarıýmdy zerttep júr. Munda joǵary temperatýra men ylǵaldylyq saqtalǵan. Kesirtkeler bul jerde ósip-ónip, uzaq ári belsendi ómir súredi dep senemiz, — dedi «Ekzotarıým» bóliminiń jetekshisi, gerpetolog Aleksandr Gýrnev.
Almatylyqtar bul erekshe janýarlardy zoobaqtyń «Ekzotarıým» bóliminen kóre alady.
Eske salaıyq, byltyr Almaty haıýanattar baǵynda 31 túrli janýardan 87 tól dúnıege keldi.