Almaty zoobaǵy jańa janýarlarmen tolyqty
Almaty zoobaǵynda jańa janýarlar paıda boldy – bul kirekeı aq aıý, zebra, Amýr jolbarysy, urǵashy shımpanze jáne qyzǵylt flamıngo. Bul týraly qalalyq Mádenıet basqarmasy málimdedi, dep habarlaıdy Kazinform.
«2023 jyly haıýanattar baǵyndaǵy 25 túrli janýardan 80 tól alyndy. Olardyń arasynda kók qoı, Shetland ponıdiń qulyny, kengýrý, kirpi, lemýr, teńbil buǵy, úı qodasy, Chapman zebrasy, sý sıyr, qozyqumaı, qumaı, japon tyrnasy, taý qazy, afrıkalyq ýly sur jylan, shyǵys kolobýsy jáne taǵy basqalary bar»,- dedi Almaty qalalyq mádenıet basqarmasynyń basshysy Ǵanı Maılybaev.
Aıtýynsha, Pýrga atty aq kirekeı kóptiń nazaryn ózine aýdardy. Qazir ol 6 jasta, eki basseıni bar jarty gektarǵa jýyq keń qorshaýda turady.
«Biz bul oqıǵany uzaq kúttik. Aq qonjyqty izdeýge jáne ony Almatyǵa jetkizý týraly kelissózderge eki jarym jylǵa jýyq ýaqyt ketti. Aqyry aq kirekeıdi tegin aldyq. Qazir Shvetsııa haıýanattar baǵynyń birimen Pýrgamyzdyń jubyn ákelý úshin kelissózder júrgizip jatyrmyz», – basqarma basshysy.
Sonymen qatar, ol Pasha esimdi erkek shımpanze byltyr Lola atty jubyn tapqanyn atap ótti.
«Ol da Pýrgý sııaqty Máskeýden jetkizildi. Alǵashynda maımyldar bólek ómir súrip, bir-birin syrttan baqylap júrdi. Qazir olar bir-birine úırenip, dos boldy. Dál osyndaı Ýrman jolbarysyna urǵashysy tańdaldy. Sonymen qatar, haıýanattar baǵy Grant zebralarymen tolyqty, olar pil, sý sıyr jáne bókendermen birge 2024 jyldyń sońynda qurylysy bastalatyn «Afrıka savannasyn» mekendeıtin bolady», - dedi Ǵanı Maılybaev.
