Almaty zoobaǵy paıdalanylǵan shyrshalardy qabyldaı bastady
ALMATY. KAZINFORM — Almaty haıýanattar baǵy paıdalanylǵan tabıǵı jańajyldyq shyrshalardy qabyldaýǵa arnalǵan ekologııalyq aktsııany bastady. Zoobaqtyń habarlaýynsha, bul bastama jasyl jelekterge «ekinshi ómir» syılap, janýarlardyń ál-aýqatyn jaqsartýǵa úles qosýǵa múmkindik beredi.
Jańa jyl merekeleri aıaqtalǵannan keıin qala turǵyndary tiri shyrshalardy qoqysqa tastamaı, olardy Almaty haıýanattar baǵyna tapsyra alady. Qabyldanǵan aǵashtar janýarlar qorshaýyna qoıylyp, olardyń tirshilik ortasyn baıytý maqsatynda paıdalanylady.
— Shyrshalar buǵy, elik, qodas, qaban jáne basqa da janýarlardyń qorshaýynda qoldanylady. Janýarlar jańa zattarǵa erekshe qyzyǵýshylyq tanytyp, shyrshalardy ıiskep, dámin tatyp, tartyp, sekirip, butaǵyna súıkenip, qabyǵymen oınaıdy. Bul olardyń qımyl-qozǵalysyn arttyryp, kúızelisti azaıtyp, kúndelikti tirshiligin árlendire túsedi, — delingen habarlamada.
Tiri shyrshalar 8-18 qańtar aralyǵynda Almaty qalasy, Ormanov kóshesi, 64 mekenjaıyndaǵy Almaty haıýanattar baǵynyń qyzmettik kireberisinde qabyldanady. Baılanys telefony: 8 (701) 676-85-85.
Almaty zoobaǵy qala turǵyndary men qonaqtaryn aktsııaǵa qatysýǵa, janýarlar men qorshaǵan ortany qorǵaýǵa úles qosýǵa úndedi.
Eske salaıyq, buǵan deıin Qazaqstan óńirlerindegi jańajyldyq jasandy jáne tiri shyrsha baǵalaryn salystyryp shyqqan edik.