Almaty zırattaryna 400 beınebaqylaý kamerasy ornatylady
ALMATY. KAZINFORM — Qaladaǵy zırattarǵa 400 beınebaqylaý kamerasyn ornatýǵa 582 mln teńgeden astam qarajat bólý josparda.
Almaty qalalyq tsıfrlandyrý basqarmasy memlekettik satyp alý portalyna 400 kamera satyp alýǵa jáne olardy jerleý oryndaryna ornatýǵa habarlandyrý jarııalady. Jobany júzege asyrýǵa 582,4 mln teńge qajet.
Qujatta satyp alynatyn qyzmetterdiń maqsaty — aqparat alý, baqylaý jáne tirkelgen buzýshylyqtar týraly tótenshe jaǵdaılar qyzmetterin jedel habardar etý, sondaı-aq qoǵamdyq qaýipsizdik deńgeıin arttyrý, qoǵamdyq tártipti saqtaý jáne Almaty qalasynyń zırattarynda vandalızm deńgeıin tómendetý ekeni aıtylǵan.
Eske salaıyq, byltyr Jambyl oblysynda zırat qorshaýyn urlap jatqan eki adam ustalǵan bolatyn.
Buǵan deıin Keńsaı zıratyndaǵy órtten 60 molaǵa zalal kelgeni týraly jazǵan edik.
Almatyda jerleý qyzmeti qansha turatynyn myna siltemege ótip bile alasyzdar.