Almaty zıratynda temir qorshaýlar urlanyp jatyr ma

ALMATY. KAZINFORM — Almatydaǵy «Batys» zıratynda keı temir qorshaýlardy júk kóligi áketken.

Bul týraly aqparat áleýmettik jelide tarady. Ondaǵy málimetke sáıkes, halyq arasynda Boraldaı zıraty («Batys») atymen tanymal moladan temir qorshaýlar júk kóligine tıelgen.

Almaty qalasynyń polıtsııa departamenti bul oqıǵaǵa qatysty túsinikteme berdi.

— Bul derek boıynsha Alataý aýdanynyń polıtsııa basqarmasy tekseris júrgizdi.
Tekserý nátıjesinde alynǵan qorshaýlar naqty menshik ıelerine tıesili emes ekeni anyqtaldy — olar ıesiz múlik retinde tanylyp, qoqys retinde áketilgen. Jumystar zırat ákimshiliginiń kelisimimen júrgizilgen. Quqyq buzýshylyq belgileri anyqtalǵan joq, — dep habarlady polıtsııa departamentiniń baspasóz qyzmeti.

Eske salaıyq, buǵan deıin Almatynyń Ýálıhanov kóshesindegi gúlzardan bútin ári jap-jańa tas tóseýish Qaskeleńdegi jeke úıge jetkizilgen. Keıin bul oqıǵaǵa baılanysty Almaty ákimdigi málimdeme jasady.

Odan bólek jóndeý jumystary júrip jatqan Úlken Almaty ózeniniń jaǵalaýynan granıt plıtalardy urlaý deregi boıynsha polıtsııa qylmystyq is qozǵady.