Almaty jurtyn zoobaqtaǵy aq aıýdyń jaǵdaıy alańdatyp qoıdy
ALMATY. KAZINFORM — Áleýmettik jelilerde Almaty haıýanattar baǵyndaǵy aq aıý — Pýrganyń vıdeosy tarady. Jeli qoldanýshylary janýardyń aptap ystyqtaǵy jaǵdaıyna alańdaýshylyq bildirdi.
Jazba avtorynyń aıtýynsha, vıdeo 11 maýsym kúni Almatyda aýa temperatýrasy shamamen 30 gradýs ystyq bolǵan kezde túsirilgen. Ol aq aıýlardyń Arktıka jaǵdaıyna beıimdelgen janýarlar ekenin aıtyp, qorshaýdaǵy salqyndatý júıesiniń jumysyna qatysty suraq qoıǵan.
Osyǵan baılanysty Almaty haıýanattar baǵy resmı túsinik berip, Pýrganyń jaǵdaıy alańdaýshylyq týǵyzbaıtynyn málimdedi.
Zoobaqtyń habarlaýynsha, janýar mamandar men veterınarlyq qyzmettiń turaqty baqylaýynda. Pýrga úshin barlyq qajetti jaǵdaı jasalǵan: qorshaýda salqyn sýy úzdiksiz aınalyp turatyn eki basseın bar, arnaıy salqyndatý júıesimen jabdyqtalǵan in-úıshigi jumys isteıdi, sondaı-aq muz ben qar generatorlary paıdalanylady.
— Aıý qorshaýdyń ashyq jáne jabyq bólikterine erkin kirip-shyǵa alady jáne ózine qolaıly oryndy ózi tańdaıdy, — dep málimdedi mekeme ókilderi.
Sondaı-aq zoobaq mamandary aq aıýlardyń kúnniń ystyq ýaqytynda kóp qozǵalyssyz demalyp jatýy qalypty minez-qulyq ekenin aıtty. Olardyń sózinshe, mundaı erekshelik tabıǵı ortada da, haıýanattar baǵynda da baıqalady.
— Qazirgi ýaqytta Pýrganyń jaǵdaıy jaqsy, al minez-qulqy fızıologııalyq normaǵa tolyq sáıkes keledi, — dep habarlady zoobaq ákimshiligi.
Eske salaıyq, buǵan deıin Almaty haıýanattar baǵynda kelýshilerdiń biri arystanǵa tas laqtyrǵanyn jazǵan edik.
