Almaty joldarynda 400-den astam mas júrgizýshi ustaldy

ALMATY. KAZINFORM – Almaty qalasynyń aýmaǵynda «Qaýipsiz jol» jedel-profılaktıkalyq is-sharasy ótip jatyr.

Іs-shara bastalǵaly beri Almatyda jol qaýipsizdigine baılanysty 52 myńnan astam ákimshilik quqyqbuzýshylyq anyqtalǵan.

Keń taraǵan quqyqbuzýshylyqtar qatarynda:

• Manevr jasaý erejelerin buzýdyń 3 myńnan astam deregi;
• Qarama-qarsy baǵytqa shyǵýdyń 222 jaǵdaıy;
• Baǵdarshamnyń tyıym salatyn belgisinen ótip ketýdiń 453 deregi;
• 439 júrgizýshi kólikti mas kúıde basqarǵany úshin ustalǵan.

Jalpy 2 775 kólik aıyppul turaǵyna qoıylǵan, onyń 935-i moped. Almaty qalasynyń jergilikti polıtsııa qyzmeti azamattardy jol qozǵalysy erejelerin qatań saqtaýǵa shaqyrdy.

Eske salaıyq, buǵan deıin Almatyda birneshe kóshe eki aıǵa jabylǵanyn jazǵanbyz.