Almaty joldaryna jasyryn patrýlder shyqty
Bul — patrýldik polıtsııa qyzmetkerleriniń azamattyq kıimde, arnaıy belgileri joq avtokóliktermen jalpy kólik aǵynynda qozǵalyp, qyzmet atqarýyn bildiredi.
Negizgi maqsat — jol qozǵalysy erejelerin óreskel buzý derekterin anyqtaý, ásirese agressıvti júrgizý faktilerin áshkereleý. Olardyń qatarynda kúrt jolaq aýystyrý, «shahmat» tásilimen júrý, basqa kólikterdi qysyp ótý jáne apattyq jaǵdaılar týyndatý sekildi qaýipti áreketter bar.
Atalǵan quqyq buzýshylyqtardy tirkeı otyryp, jasyryn patrýlder aqparatty naqty ýaqyt rejıminde jaqyn mańdaǵy patrýldik polıtsııa ekıpajdaryna joldaıdy. Keıin sol ekıpajdar kólikti toqtatyp, júrgizýshini zańnamada belgilengen tártippen jaýapkershilikke tartady. Bul tájirıbe óziniń tıimdiligin kórsetti. Tek ótken demalys kúnderiniń ózinde Almaty qalasynda agressıvti júrgizýdiń 28 deregi anyqtalyp, joly kesildi. Barlyq quqyq buzýshy jaýapkershilikke tartyldy.
PD málimetinshe, jasyryn patrýldeýdi engizý júrgizýshilerdiń tártibin arttyrýǵa jáne jol-kólik oqıǵalarynyń aldyn alýǵa, ásirese qaýipti júrgizý mánerinen týyndaıtyn apattardyń sanyn azaıtýǵa baǵyttalǵan.
— Jasyryn patrýldeý — kózge birden túse bermeıtin óreskel quqyq buzýshylyqtardy anyqtaýdyń tıimdi quraly. Polıtsııa qyzmetkerleri jalpy kólik aǵynynda júrip, júrgizýshilerdiń naqty minez-qulqyn baqylaıdy. Ásirese agressıvti júrgizý — «shahmat» tásilimen júrý, kúrt manevr jasaý jáne ózge de qaýipti áreketter basty nazarda. Mundaı faktiler jedel túrde jaqyn mańdaǵy ekıpajdarǵa jetkizilip, tıisti sharalar qabyldanady. Bizdiń mindet — tek jaýapkershilikke tartý ǵana emes, qaýipsiz júrgizý mádenıetin qalyptastyrý, — dedi PD ákimshilik polıtsııa basqarmasynyń bastyǵy Abdınýr Tasybaev.
Aıta ketelik elordada jol erejesi kameralaryn tıisti quralsyz teksergen zerthana jumysyn toqtatqan edi.