Almaty jylý elektr ortalyqtary qashan gazǵa kóshiriledi

ASTANA. KAZINFORM — Almatynyń 2 jylý elektr ortalyǵy kelesi jyldyń sońyna deıin tolyqtaı gazǵa kóshiriledi. Bul týraly «Samuryq-Energo» AQ basqarma tóraǵasy Qaırat Maqsutov aıtty. 

— Búginde «Samuryq-Energo» aýqymdy ınvestıtsııalyq baǵdarlamany iske asyryp jatyr. Kompanııa portfelinde 34 ınvestıtsııalyq joba bar. 2032 jylǵa deıin paıdalanýǵa berý josparlanyp otyrǵan jalpy belgilengen qýat 11,5 gıgavatt jańa generatsııaǵa teń. Bul 14,5 trln teńge. Eger jalpy alyp qaraıtyn bolsaq, Qazaqstannyń energetıka salasynda júzege asyrylyp jatqan barlyq ınvestıtsııalyq jobanyń 60 paıyzy «Samuryq-Energo» jobalaryna tıesili, — dedi kompanııa basshysy «Samuryq-Qazyna» AQ qoǵamdyq keńesiniń otyrysynda.

Onyń atap ótýinshe, eń mańyzdy jobalardyń biri — Almaty qalasyn gazdandyrý. Ony 2026 jyly aıaqtaý josparlanyp otyr.

— JEO-2 men JEO-3 gazǵa kóshiriletin bolady. Bul jobalar keler jyldyń sońyna deıin aıaqtalyp, gaz stansasy iske qosylady. Ózderińiz de bilesizder, ortalyqtarda eń zamanaýı tehnologııalyq jabdyqtar ornatylady. JEO-2-de — bul Siemens týrbınasy, al JEO-3-te — Ansaldo týrbınasy. Almaty jylý ortalyqtaryn jańǵyrtýdyń úlken áseri bolady dep kútemiz, — dedi Qaırat Maqsutov.

Aıta ketelik problemalyq toǵyz JEO qyzyl aımaqtan shyǵarylǵan edi.