Almaty JEO-1 men JEO-2 arasyndaǵy jylý magıstrali úshin jerler memleketke ótedi
ALMATY. KAZINFORM – Almaty ákimi memlekettik qajettilikter úshin shamamen 50-ge jýyq jer telimin alý týraly qaýlyǵa qol qoıdy.
Qalalyq gazettiń resmı saıtynda jarııalanǵan qujatqa sáıkes, JEO-2 – JEO-1 (Gúlder) jylý magıstralin jańǵyrtý jobasy úshin TK 18-3-ten JEO-1-ge deıingi aralyqta 45 jer ýchaskesi men jyljymaıtyn múlik nysanyn memleket menshigine alý josparlanyp otyr. Bul nysandar Rysqulov dańǵyly, ıAblochkov, Týrınskaıa kósheleri boıynda, sondaı-aq Jetisý aýdanyndaǵy JEO-1 aýmaǵyna jaqyn ornalasqan.
Myna mekenjaılardaǵy jer telimderi memleket menshigine ótedi: Rysqulov dańǵyly (43, 45, 52A), Polejaev kóshesi (168, 172), ıAblochkov kóshesi (2, 49, 55, 57), Shámıev kóshesi (3, №17 úı-jaı), Polzýnov kóshesi (4), Týrınskaıa kóshesi (2, 4, 6, 8, 10, 12, 14, 16, 18, 20, 22, 28, 30, 30/1), Lenskıı kóshesi (24/3, 4/26, 5, 8A) jáne Tıýmenskaıa kóshesi (3/32, 6, 7, 7/1, 10).
Sonymen qatar jekelegen qaýlyǵa sáıkes:
• Jansúgirov kóshesiniń batysynda jáne Dinmuhamed Qonaev atyndaǵy kanaldyń soltústiginde ornalasqan «Adam» JShS-ne tıesili 1,2581 gektar jer telimi ınnovatsııalyq shyǵarmashylyq ortalyq salý úshin memleket menshigine ótedi;
• Almaly aýdanyndaǵy Álimjanov kóshesi, 73 mekenjaıynda ornalasqan 0,1595 gektar jer telimi qoǵamdyq keńistikti abattandyrý maqsatynda ıelikten shyǵarylady;
• Naýryzbaı aýdanyndaǵy Aqjar yqshamaýdanynda (Jandosov kóshesiniń soltústigi men Eginsý kóshesiniń shyǵysynda) ornalasqan úsh jer ýchaskesi avtobýs parkin salý úshin memleket qajetine alynady.
Alynatyn barlyq jer teliminiń ıesine qoldanystaǵy zańnamaǵa sáıkes ótemaqy tólenedi.
Jerdi májbúrlep ıelikten shyǵarý merzimi 2027 jyldyń 31 jeltoqsanyna deıin belgilengen.
Eske salaıyq, buǵan deıin Almaty oblysynda joldardy Úlken Almaty aınalma jolyna jalǵaý úshin jer telimderi alynatynyn jazǵanbyz.
