«Almaty jastaryna» ótinim bergen 2 myńǵa jýyq jas baspanaly boldy

ALMATY. KAZINFORM — «Almaty jastary» baǵdarlamasynyń jeńimpazdar anyqtaldy. Bıyl turǵyn úı baǵdarlamasyna 7072 ótinim kelip túsken.

Almaty qalasy kommýnaldyq ınfraqurylymdy damytý basqarmasy 2024 jylǵy 29 shildeden 7 tamyzǵa deıin «Almaty jastary» baǵdarlamasyna ótinim qabyldaǵan bolatyn.  

Baǵdarlama aıasynda turǵyn úı satyp alýǵa keminde 1200 zaem berý josparlanǵan.

Jastardan kelip túsken 7072 ótinimniń salalar boıynsha bólinisi:

— Densaýlyq saqtaý — 1662;
— Bilim berý — 2434;
— Mádenıet — 430;
— Sport — 129;
— JOO men ǴZI — 717;
— Jýrnalıster — 123;
— Áleýmettik sala — 352;
— Quqyq qorǵaý organdary — 538;
— Kommýnaldyq qyzmetter — 433;
— Jumys isteıtin jastar — 254.

Almaty ákimdigi muqııat qarastyrýdan keıin 1924 ótinim maquldanǵanyn habarlady.

Maquldanǵan ótinimder mynadaı:

— Densaýlyq saqtaý — 456;
— Bilim berý — 662;
— Mádenıet — 165;
— Sport — 42;
— JOO men ǴZI — 196;
— Jýrnalıster — 57;
— Áleýmettik sala — 40;
— Quqyq qorǵaý organdary — 170;
— Kommýnaldyq qyzmetter — 105;
— Jumys isteıtin jastar — 31.

1200 ótinim berýshi «Otbasy bank» AQ-nan tólem qabiletinen ótý úshin joldama alady.

Joldamany alǵan qatysýshylar 15 (on bes) jumys kúni ishinde tólem qabiletin baǵalaýdan ótý úshin «Otbasy bank» AQ-nyń kez kelgen qyzmet kórsetý ortalyǵyna júginý qajet. 

Tólem qabiletin rastaǵan qatysýshylar 45 (qyryq bes) kúntizbelik kúni ishinde alǵashqy jáne ekinshi naryqta turǵyn úı tańdaı alady.

724 qatysýshy negizgi tizim boıynsha tólem qabiletin rastaý aıaqtalǵansha rezervtik tizimde bolady. 5148 qatysýshynyń qujaty qaıtaryldy.

Qaıtarylýdyń negizgi sebepteri jumys ornynyń baǵdarlama talaptaryna sáıkes kelmeýi, turǵyn úıge qajetti anyqtamalardyń bolmaýy, ótinish bergen sátte turǵyn úıdiń bolýy, sońǵy 6 aıdaǵy zeınetaqy jınaqtarynyń bolmaýy jáne t. b.

«Almaty jastary» baǵdarlamasynyń qorytyndysy týraly basqa da tolyq aqparat almaty-zhastary2024.kz saıtynda jarııalanady.