«Almaty Jastary» baǵdarlamasy boıynsha 6626 ótinim tústi
ALMATY. KAZINFORM — Almaty qalasy kommýnaldyq ınfraqurylymdy damytý basqarmasy 2025 jyldyń 14-26 naýryz aralyǵynda ótken «Almaty jastary» baǵdarlamasy boıynsha ótinimderdi qabyldaý qorytyndysyn shyǵardy.
Basqarmadan málim etkendeı, barlyǵy 6626 ótinim tústi.
Onyń basym bóligi bilim berý salasynyń ókilderinen tústi — 2191. Budan keıin densaýlyq saqtaý (1381), jumys isteıtin jastar (881), JOO jáne ǴZI (635), kommýnaldyq qyzmetter (428), mádenıet (360), quqyq qorǵaý organdary (343), Áleýmettik sala (245), sport (86) jáne jýrnalıstıka (76) salasy.
— 2025 jyly baǵdarlama aıasynda turǵyn úı satyp alýǵa keminde 2550 zaem berý josparlanyp otyr. Onyń ishinde 1050 zaem «Jumys isteıtin jastar» baǵdarlamasynyń jalǵa alýshylaryna arnalǵan. Sondaı-aq birqatar baǵyt boıynsha kvotalar anyqtaldy: bilim — keminde 350 zaem; densaýlyq saqtaý keminde 350 zaem; respýblıkalyq kásiporyndar men uıymdardyń qyzmetkerleri jalpy kólemniń 5%-dan aspaıdy; quqyq qorǵaý organdary 5%-dan aspaıdy, — dep atap ótti basqarmadan.
Berilgen ótinimderdi qaraý qorytyndysy boıynsha 3412 qatysýshyǵa qatysty oń sheshim shyǵaryldy. Maquldanǵan ótinimderdi salalar boıynsha bólý:
* bilim — 994;
* densaýlyq saqtaý — 630;
* jumys isteıtin jastar — 759;
* respýblıkalyq memlekettik uıymdardyń qyzmetkerleri — 249;
* quqyq qorǵaý organdary — 167;
* qalǵan salalar — 613.
Maquldanǵandardyń qatarynda «Jumys isteıtin jastar» baǵdarlamasynyń 759 jalǵa alýshysy bar, olarǵa «Otbasy bank» AQ-ǵa joldamalar berilgen.
Úsh kezeńde 1500 qatysýshy tólem qabilettiligin rastaý úshin bankke joldama alady. Olar 15 jumys kúni ishinde banktiń qyzmet kórsetý ortalyǵyna habarlasýy kerek. Tólem qabilettiligi rastalǵan jaǵdaıda qatysýshylar 45 kúntizbelik kún ishinde bastapqy nemese qaıtalama naryqtaǵy turǵyn úıdi tańdaı alady.
Qosymsha 1153 qatysýshy negizgi quramdy baǵalaý aıaqtalǵanǵa deıin rezervtik tizimge engizildi. 3214 ótinish berýshi tizimnen shyǵaryldy, negizgi sebepteri — jumys ornynyń baǵdarlama talaptaryna sáıkes kelmeýi, menshiginde turǵyn úıdiń bolýy, qajetti anyqtamalardyń bolmaýy, sońǵy 6 aıda zeınetaqy aýdarymdarynyń bolmaýy jáne basqalar.
Eske salaıyq, osy jyldan bastap «Almaty jastary» turǵyn úı baǵdarlamasy boıynsha nesıelendirý mólsheri 18 mln teńgeden 20 mln teńgege deıin ulǵaıtyldy.
Sondaı-aq 2025 jyly «Almaty jastary» baǵdarlamasymen úı alatyn jastar sany kóbeıetinin jazǵanbyz.