«Almaty jastary» baǵdarlamasy bıyl 20 mln teńgege deıin nesıe beredi
ALMATY. KAZINFORM – Osy jyldan bastap «Almaty jastary» turǵyn úı baǵdarlamasy boıynsha nesıelendirý mólsheri 18 mln teńgeden 20 mln teńgege deıin ulǵaıtyldy.
Almaty ákimdigi 14-26 naýryz aralyǵynda 35 jasqa deıingi qala jastary úshin «Almaty jastary» baǵdarlamasy aıasynda jeńildetilgen turǵyn úı nesıelerin alý boıynsha ótinishti qabyldaý bastalǵanyn málimdedi.
Baǵdarlamaǵa qatysýǵa ótinishti www.almaty-zhastary2025.kz resmı saıty arqyly berýge bolady, avtorızatsııa elektrondyq tsıfrlyq qoltańba (ETsQ) arqyly júzege asyrylady.
Baǵdarlama aıasyndaǵy nesıelendirý sharttary:
- Eń joǵarǵy nesıe somasy – 20 mln teńgege deıin;
- Paıyzdyq mólsherleme – 5%;
- Bastapqy jarna – 10%;
- Bastapqy jáne qaıtalama turǵyn úıdi satyp alý múmkindigi;
- Baǵdarlama boıynsha qamtý – keminde 2550 adam, onyń ishinde 1050 «Jumys isteıtin jastar» baǵdarlamasynyń jalǵa alýshylary.
Baǵdarlamaǵa qatysý úshin negizgi talaptar:
1. Ótinish berýshi men onyń jubaıynyń (zaıybynyń) ótinish berý kezindegi Almaty qalasynda turaqty tirkeýi bolýǵa tıis.
2. Ótinish berýshiniń jasy ótinish berý sátinde 35 jastan aspaýy tıis (jubaıynyń jasyna qaramastan). Baǵdarlamaǵa negizgi qatysýshy retinde erli-zaıyptynyń bireýi ǵana qatysa alady (bar bolsa).
3. Ótinish berýshi men onyń otbasy músheleriniń menshiginde turǵyn úı bolmaýǵa tıis, sondaı-aq Qazaqstan Respýblıkasynyń aýmaǵynda sońǵy 5 jyl ishinde turǵyn úı jaǵdaıyn ádeıi nasharlatý faktileri bolmaýy kerek.
4. Ótinish berýshi sońǵy 6 (alty) aıda Almaty qalasynda resmı túrde jumys istegen bolýy kerek jáne mindetti zeınetaqy jarnalary tólenýi qajet.
Qatysýshy tańdaǵan kelesi salalardyń birinde eńbek ótili bolýy kerek: densaýlyq saqtaý, bilim berý, mádenıet, sport, joǵary oqý oryndary men ǵylymı-zertteý ınstıtýttary, jýrnalıstıka, áleýmettik sala, quqyq qorǵaý organdary, qalalyq kommýnaldyq qyzmetter.
Eske salaıyq, buǵan deıin «Almaty jastaryna» ótinim bergen 2 myńǵa jýyq jas baspanaly boldy.
2025 jyly «Almaty jastary» baǵdarlamasymen úı alatyn jastar sany kóbeıetinin jazǵanbyz.