Almaty jáne Shymkent áýejaıynyń aýmaǵy jeke sektor esebinen ulǵaıtylady
ASTANA. KAZINFORM – Elimizde áýejaılar týraly aıtsaq, qolaısyz jaǵdaı ásirese Almaty, Shymkent qalasy jáne Almaty oblysynda kezdesedi. Bul týraly Premer-Mınıstrdiń orynbasary Roman Sklıar depýtattyq saýaldyń jaýabynda málim etti.
Bıyl 1 aqpanda «Aq jol» partııasynyń depýtattary Premer-Mınıstrdiń orynbasary Roman Sklıarǵa saýal joldady. Halyq qalaýlylary 2019 jylǵy Almatyda Bek Air kompanııasynyń ushaq apatyna qatysty jan-jaqty tergeýdi talap etti. Sonymen qosa, saýalda elimizdegi ǵımarattary qaýipti ári tozǵan áýejaılardy jańǵyrtý kerektigi aıtylǵan. Úkimet basshysynyń birinshi orynbasarynyń aıtýynsha, búginde ushaq apatyna qatysty tergeý aıaqtaldy.
«Tergeý qorytyndysy boıynsha ushaqtyń aldyńǵy borttyń quıyndy aǵynyna túsý nusqasy rastalmady. Sońǵy esep boıynsha apattyń sebebi – muzǵa qarsy suıyqtyqpen óńdelmegen, saldarynan ushaq qanatyna muz qatqan», - dep jaýap berdi Roman Sklıar.
Sondaı-aq, ushaq apatyn tergeý jónindegi komıssııa áýejaı mańyndaǵy aýmaqta jer ýchaskelerin berý jáne qurylys júrgizý jónindegi talaptardy qatańdatý boıynsha jáne muz qatýǵa qarsy qaǵıdalardy bekitý týraly usynymdar berdi.
«Azamattyq avıatsııa salasyndaǵy ýákiletti organ bul usynystardy oryndady», - dep tolyqtyrdy Premer-Mınıstrdiń birinshi orynbasary.
Onyń málimdeýinshe, Qazaqstannyń avıatsııalyq ákimshiligi ushý qaýipsizdigin qamtamasyz etýdi turaqty qadaǵalaýdy júzege asyrady. Kedergilerdiń bolýy problemasyn zerdeleý, olardy joıý máselesin sheshý, sondaı-aq áýejaılardyń aýmaǵy men mańynda bolýy múmkin kedergilerdiń aldyn alý boıynsha jumystar júrgizilip jatyr. Búginde 2019 jylǵy «Bek Air» AQ ushaǵynyń apatqa ushyraý faktisi boıynsha kináli tulǵalardy anyqtaý úshin tergeý is-sharalary jalǵasýda.
«Almaty qalasynyń ákimdigi aýdany 17,4 gektar 104 jer ýchaskesin ıelikten shyǵaryp, áýejaıdyń ushý jolaǵynyń kólemin keńeıtý jónindegi is-sharalar josparyn bekitti. Sonymen qatar Almaty oblysy Talǵar aýdanynyń ákimdigi 7,3 gektar jer ýchaskesin májbúrlep ıelikten shyǵarýdy bastaý týraly qaýly qabyldady», - dep naqtylady depýtattyq saýal jaýabynda Roman Sklıar.
Odan bólek, Almaty qalalyq áýejaıynyń qoldanystaǵy qorshaýyn aýystyrý úshin shamamen 60 metr qashyqtyqta 49 jer ýchaskesin alý josparlanyp otyr. Sondaı-aq, Shymkent qalasy ákimdigi sanıtarlyq-qorǵaý aımaǵyndaǵy memleket muqtajy úshin 307 jer ýchaskesin alyp qoıý týraly qaýly qabyldady. Qalǵan óńirlerde ákimdikter alyp qoıýǵa jatatyn jer ýchaskelerin anyqtaý boıynsha jumysty jalǵastyryp jatyr.
