Almaty jáne Almaty oblystarynda elektr energııasyna tarıf kóterilmeıdi
ASTANA. KAZINFORM – Almaty qalasy men Almaty oblysynda elektr energııasyna tarıfterdiń ósýi múmkin ekendigi týraly aqparattyń taralýyna baılanysty Ulttyq ekonomıka mınıstrliginiń Tabıǵı monopolııalardy retteý komıteti túsinikteme berdi.
2025 jylǵy 25 tamyzda «Alataý Jaryq Kompanııasy» AQ — «EnergoSbyt» fılıalynan elektr energııasyn jetkizý tarıfiniń aldaǵy ýaqytta kóterilýi týraly resmı habarlama kelip tústi.
Kásipkerlik kodeksiniń 124-6-babynyń 6) tarmaqshasyna sáıkes habarlama jobasyn qaraý mindetti túrde jarııa tyńdaýlar ótkize otyryp júrgiziledi. Bul protsess transparenttilikti qamtamasyz etýge, sondaı-aq tutynýshylar men basqa da múddeli taraptardyń pikirlerin eskerýge baǵyttalǵan.
— Tarıf boıynsha sheshim óńirdegi aǵymdaǵy áleýmettik-ekonomıkalyq jaǵdaıdy mindetti túrde eskere otyryp, ekonomıkalyq negizdelgen esepteýler men qujattalǵan derekter negizinde ǵana qabyldanatyn bolady.
Qarastyrylyp otyrǵan habarlama sheńberinde aldyn ala sheshim boıynsha elektr energııasyn tek óz qajettilikteri úshin paıdalanatyn turmystyq tutynýshylar úshin tarıfti kóterý kútilmeıtinin erekshe atap ótemiz.
Áleýmettik osal jáne az qamtylǵan azamattar úshin jergilikti atqarýshy organdar arqyly iske asyrylatyn turǵyn úı kómegi tetiginiń kúshi saqtalatynyn qosymsha habarlaımyz, — delingen habarlamada.
Belgilengen erejelerge sáıkes, turǵyn úı kómegi otbasynyń jıyntyq kommýnaldyq shyǵyndary jalpy tabystyń 5% — dan asatyn jaǵdaılarda beriledi. Mundaı jaǵdaıda aıyrmashylyq ákimdikterdiń bıýdjeti esebinen óteledi.
— Habarlamany jáne usynylǵan materıaldardy qaraý nátıjeleri boıynsha túpkilikti sheshim 2025 jylǵy 25 qyrkúıekten erte qabyldanbaıdy. Kórsetilgen kúnge deıin usynylǵan negizdemelerdi taldaý, sondaı-aq jarııa talqylaý barysynda kelip túsken usynystar men eskertýlerdi esepke alý boıynsha jumys jalǵasyp jatyr, — delingen Tabıǵı monopolııalardy retteý komıteti habarlamasynda.
Aıta ketelik áleýmettik mańyzy bar azyq-túlik óndirýshilerine arnalǵan tarıf jyl sońyna deıin óspeıdi.